Dzyudo. Endi bor etibor Jahon chempionatiga qaratiladi

Ushbu musobaqa dzyudo vatani - Yaponiyada o'tkaziladi. 25-31 avgust kunlari Tokio shahrida kelasi yili ushbu mamlakatda o'tkaziluvchi Olimpiya o'yinlariga eng katta reyting ochkosini berishi bilan ahamiyatli bo'lgan dunyo birinchiligi tashkil etiladi. 

Jahon chempionatida sayyoramizning 5 qitasi, 141 davlatidan jami 835 nafar (506 erkak, 329 ayol) dzyudochi musobaqa medallari ham Olimpiadaning muhim reyting ochkolari uchun tatamiga chiqadi.

Erkaklar -60, -66, -73, -81, -90, -100, +100 kg, ayollar esa -48, -52, -57, -63, -70, -78 hamda +78 kg vazn toifalarida bahslarga kirishadi. Jahon chempionati qitaviy chempionatlar, Gran-pri, "Katta Dubulg'a" va "Masters" seriyasiga kiruvchi turnirlar orasida eng ko'p ochko berishi bilan ahamiyatli bo'lgan musobaqa hisoblanadi. 

Jahon chempionlari 2000 reyting ochkosini qo'lga kiritadi. Kumush medal sohiblari 1400, bronza medal egalari esa 1000 reyting ochkosiga ega bo'ladi. Beshinchi o'rin egalari 720, ettinchi pog'onadan joy olganlar 520 ochkoni rasmiylashtiradi. Keyingi o'rinlar bilan kifoyalangan dzyudochilar mos ravishda 320, 240 va 200 reyting ochkosini o'z hisoblariga yozib qo'yishadi.   

O'zbekiston dzyudo federaciyasi matbuot xizmati