Dzyudochilarimiz Bremen Masters turnirida 3 ta medal qo'lga kiritishdi, 1 tasi oltin + FOTO

Deyarli 40 yildan beri o'tkazib kelinayotgan ushbu nufuzli musobaqada Yaponiya, Braziliya, Gruziya, Ozarbayjon, Qozog'iston, Finlyandiya, Germaniya, O'zbekiston kabi jami 25 davlatdan 600 nafardan ziyod yosh dzyudochilar tatamiga chiqdi. O'z vaqtida mazkur turnirda Xifume Abe, Naoxisa Takato, Takanori Nagase, Aaron Volf, Lukash Krpalek, Diyorbek O'razboev singari Olimpiada chempioni va sovrindorlari g'olib bo'lgan.  

Bu yilgi musobaqada Iskandar Rasulov bosh murabbiyligidagi O'zbekiston yoshlar terma jamoasining 8 nafar dzyudochisi ikki kun davomidagi murosasiz bellashuvlarda yurtimiz sharafini himoya qildi. Yakunda ularning uch nafari shohsupaga ko'tarildi. 

Darvoqe, dzyudochilik paytida Bremen turnirida chempion bo'lgan Diyorbek O'razboevning aynan shu musobaqadan murabbiylik faoliyati boshlandi. Rio Olimpiadasi sovrindoriga murabbiylik faoliyatida ham omad tilaymiz. 

-81 kg vaznda kurashgan Mardon Ravshanov barcha raqiblarini mag'lubiyatga uchratib, musobaqa oltin medalini qo'lga kiritdi. Ravshanov 1/2 finalda yaponiyalik Suzukidan, finalda esa braziliyalik Luan Almeydadan ustun keldi. Hamyurtimiz saralash bahslarida Braziliya, Finlyandiya va ikki germaniyalik raqiblarini mag'lubiyatga uchrata oldi.  

-90 kg vazn toifasi finalida tatamiga chiqqan Alisher Samanov ozarbayjonlik Aslan Kocoevga imkoniyatni boy berib, kumush medal bilan taqdirlandi. -73 kg vazndagi dzyudochimiz Hojiakbar Toshev esa bronza medaliga sazovor bo'ldi. 

Musobaqa yakuniga ko'ra O'zbekiston terma jamoasi umumjamoa hisobida kuchli uchlikdan joy oldi. Katta tarkib bilan ishtirok etgan Ozarbayjon terma jamoasi 4 ta oltin, 3 ta bronza medali bilan birinchi o'rinni egalladi. Dzyudo vatani vakillari - yaponiyaliklar 2 ta oltin, 1 ta kumush, 2 ta bronza medali bilan ikkinchi o'rindan joy olishdi.