13 noy 17:06
Yangiliklar

Boks/MMA

Eddi Xirn: "Ennis - Ortis jangi shartlari kelishib olindi"

Britaniyalik promouter Eddi Xirn birinchi o'rta vaznda ikki vaqtinchalik jahon chempionlari - Jeyron Ennis va Virjil Ortis o'rtasidagi jang shartlari ushbu bahsni translyaciya qilishdan manfaatdor bo'lgan DAZN striming xizmati bilan kelishilganini malum qildi.

"DAZN rahbariyati, men, Oskar De La Xoyya, Erik Gomes bilan uchrashuv o'tkazdik va ushbu jang shartlari bo'yicha kelishib oldik, - dedi WBA vaqtinchalik chempioni Ennisning manfaatlarini himoya qiluvchi Xirn ESPN’ga bergan intervyusida. - Ennis bu shartlarga rozi bo'ldi, shuning uchun agar Ortisning promouterlari bandlarni o'zgartirmoqchi bo'lsa, biz buni qayta muhokama qilishimiz kerak bo'ladi".

Ortis va Ennis jangi bo'yicha kelishuv 8 noyabr kuni WBC vaqtinchalik chempioni Virjil Ortisning Erikson Lyubinga qarshi jangi oldidan amalga oshib bo'lgandi. Jangning ikkinchi raundida Ortis Lyubinni texnik nokautga uchratgan edi.

"Lekin ular bu jangni unchalik xohlashmayapti. Virjil - ajoyib jangchi, Ennis ham. Bu jangni o'tkazmaslikka sabab topish oson", - dedi Xirn Ortisning promouterlari haqida.

"Menga ularning men eshitgan ko'plab bayonotlari yoqmaydi, ammo aniq bilamanki, DAZN bu jangni o'tkazish uchun hammaga katta bosim o'tkazadi. SHuning uchun biz Dallasga, Ortis va Lyubinning jangiga biz istayotgan jangga 100 foiz qiziqishimizni ko'rsatish uchun keldik", - deya so'zlariga yakun yasadi Xirn.