Gulistonda gimnastika sporti turlariga ixtisoslashtirilgan sport maktabi foydalanishga topshirildi

Mazkur obekt qurilishi uchun 4 milliard 30,0 million so'm sarflandi, sport inshooti 187,6 mln so'mlik sport anjomlari va inventarlari bilan taminlandi. Endi sirdaryolik yoshlar gimnastikaga ixtisoslashtirilgan bolalar-o'smirlar sport maktabi tasarrufidagi mazkur majmuada badiiy gimnastika, sport gimnastikasi, batutda sakrash, sport akrobatikasi, aerobika kabi sport turlari bilan shug'ullanishlari mumkin.

Gimnastikaga ixtisoslashtirilgan bolalar-o'smirlar sport maktabi universal zalining ochilish marosimida Jismoniy tarbiya va sport vaziri D.Nabiev, Sirdaryo viloyati hokimi G'.Mirzaev, O'zbekiston gimnastika federaciyasi birinchi vice-prezidenti Ruslan Mustaev, trampolin bo'yicha O'zbekiston milliy terma jamoasi bosh murabbiyi, Olimpiya o'yinlari sovrindori Ekaterina Xilko va boshqalar ishtirok etishdi. Tadbir davomida Osiyo o'yinlari kumush medali sohibi Sabina Toshkenboeva, o'smirlar Olimpiya o'yinlari qatnashchisi, Osiyo chempioni Anora Davlatova singari taniqli sportchilar Sirdaryolik yosh sportchilarga mahorat darsi o'tib berishdi.

Jismoniy tarbiya va sport vaziri D.Nabiev sirdaryoliklarni qo'shaloq bayram – Navro'z ayyomi hamda ko'rkam, zamonaviy sport majmuasining ochilish marosimi bilan qutlarkan, jumladan, shunday dedi:

– Mamlakatimiz rahbarining Sirdaryoga tashrifidan so'ng, viloyat sporti yangi o'zgarishlar, yanada yuqori ko'rsatkichlar sari yuz tutdi. Mazkur zamonaviy majmuaning foydalanishga topshirilishi ham ushbu jarayonning bir bo'lagidir. Sirdaryo zamini yurtimizga juda ko'p istedodlarni tarbiyalab bergan. Endi mana shu gimnastika turlariga ixtisoslashtirilgan bolalar-o'smirlar sport maktabidan ham Vatanimiz shanini jahon maydonlarida munosib himoya qiladigan o'g'il-qizlar etishib chiqishiga shubha yo'q.