Hasanboy Do'smatov va Bahodir Jalolov endi podpolkovnik (FOTO)

Milliy gvardiya harbiy xizmatchisi bo'lgan har ikki bokschi, shuningdek, "Alo xizmatlari uchun" ko'krak nishoni va qimmatbaho sovg'alar bilan ham taqdirlandi.

Milliy gvardiya qo'mondoni general-mayor Rustam Jo'raev Parij-2024 Olimpiya o'yinlarida ishtirok etgan Milliy gvardiya harbiy xizmatchilari kapitan Bahodir Jalolov va kapitan Hasanboy Do'smatovga muddatidan oldin podpolkovnik harbiy unvonlarini topshirdi. Bu haqda idora matbuot xizmati xabar berdi.

Tantanali tadbir davomida Milliy gvardiya qo'mondoni buyrug'i bilan Parij-2024 XXXIII yozgi Olimpiya o'yinlarida munosib ishtirok etgan Milliy gvardiya harbiy xizmatchi va xodimlari, ularning murabbiylari hamda g'oliblarning ota-onalari rag'batlantirildi.

Bundan tashqari, Milliy gvardiya shaxsiy tarkibi orasida o'zlarining sadoqati, jasorati va mardligi bilan o'rnak bo'lib, ustoz-shogird ananalariga muvofiq harbiy xizmatchilar va yoshlar orasida sportni targ'ib qilishga qo'shgan ulkan hissasi uchun, kapitan Bahodir Jalolov va kapitan Xasanboy Do'smatovga Qurolli Kuchlar Oliy bosh qo'mondonining ruxsati bilan navbatdan tashqari podpolkovnik harbiy unvoni muddatidan oldin berildi.