Havaskorlar o'rtasida tennis musobaqasi yakunlandi

Jumladan, Jismoniy tarbiya va sport vazirligi, Milliy Olimpiya qo'mitasi, O'zbekiston tennis federaciyasi, O'zbekiston Milliy banki hamkorligida Respublika Olimpiya zaxiralari tennis maktabida tennis bo'yicha havaskorlar o'rtasida «Havas-2020” musobaqasi tashkil etildi.

Ushbu musobaqada turli tashkilot va idoralarda faoliyat olib borayotgan 30 nafarga yaqin rahbar xodimlar 15ta juftlikda 4 guruhga bo'lingan holda dastlab guruh, so'ngra pley-off bosqichida g'oliblik uchun bahs olib borishdi.

Kecha ushbu musobaqaning yarim final hamda final uchrashuvlari o'tkazildi. SHuningdek, turnirning yopilish marosimi ham tashkil etildi. Musobaqaning yopilish marosimida Jismoniy tarbiya va sport vaziri Dilmurod Nabiev, Jismoniy tarbiya va sport vazirining birinchi o'rinbosari Ravshan Ermatov, Milliy Olimpiya qo'mitasi prezidenti Rustam SHoabdurahmonov, O'zbekiston tennis federaciyasi raisi Alisher Mirsoatov hamda boshqa mutasaddilar ishtirok etishdi.

SHuningdek, musobaqaning yopilish marosimida mamlakatimizda sog'lom turmush tarzini shakllantirish, aholi, ayniqsa yosh avlodning jismoniy tarbiya va ommaviy sport bilan muntazam shug'ullanishi, xodimlar o'rtasida jismoniy tarbiya va sportni yanada rivojlantirishga qo'shgan munosib hissasi uchun O'zbekiston tennis federaciyasi raisi Alisher Kudratullaevich Mirsoatov «Jismoniy tarbiya va sport alochisi» ko'krak nishoni bilan taqdirlandi.

Turnirning yakuniy natijalariga ko'ra, Furqat Karimov va Yorqin Zoirov juftligi raqiblariga hech qanday imkoniyat qoldirmagan holda 1-o'rinni qo'lga kiritdi. 2-o'rin Valeriy Tyan hamda Vladislav SHegay juftligiga nasib etgan bo'lsa, Muhsin Ashurov-Artur Maurer dueti kuchli uchlikni yakunlab berdi.