Humoyun Sultonov Astana turniridagi yurishini boshladi

Ushbu musobaqada hamyurtimiz Humoyun Sultonov ham ishtirok etyapti. Mamlakatimizning birinchi raketkasi 1/16 finalda rossiyalik Aleksey Mokrovni 6/1, 6/4 hisobida mag'lubiyatga uchratdi. Yana bir istedodli tennischimiz Amir Milushev esa reytingda o'zidan deyarli 1000 pog'ona yuqorida turgan rossiyalik Egor Gerasimovga imkoniyatni boy berib qo'ydi - 2/6, 1/6. 

Taqqoslash uchun, Milushev ATP reytingida 1855, Gerasimov esa 810-pog'onani band etgan. Sultonov 446, Mokrov 1761-o'rindan joy olgan. Endi turnirda ettinchi raqam ostida tasniflangan Humoyun 1/8 final uchrashuvida yaponiyalik Seyta Vatanabega qarshi kortga chiqadi. Reyingning 1287-pog'onasida borayotgan Kunchiqar yurt vakili bugun qozog'istonlik Timur Maulenovni 3/6, 6/3, 6/2 hisobida mag'lubiyatga uchratdi.