IJF rasmiylari bilan “Katta Dubulg'a”ga tayyorgarlik muhokama qilindi

“Humo Arena” mezbonligida Tokio Olimpiadasiga qimmatli reyting ochkolarini taqdim qiluvchi bunday musobaqa ilk bor yurtimizda o'tkazilayotgani unga bo'lgan tayyorgarlikning ham yuqori saviyada bo'lishini talab qiladi. Bu borada Xalqaro dzyudo federaciyasi (IJF) O'zbekiston MOQ va O'zbekiston dzyudo federaciyasi bilan hamkorlikda faoliyat olib bormoqda. 

MOQ Bosh kotibi Oybek Kasimov, MOQ raisi o'rinbosari, O'zbekiston dzyudo federaciyasi raisi Azizjon Kamilov musobaqalarni o'tkazish bo'yicha IJF menejeri Lisa Allan va ushbu xalqaro tashkilotda ishlayotgan hamyurtimiz Abdullo Murodov bilan musobaqa tashkiliy ishlariga bag'ishlangan qator masalalarni muhokama qilib olishdi.

Uchrashuvda Oybek Kasimov hamda Azizjon Kamilov Toshkent “Katta Dubulg'a” turnirini o'tkazish, tashrif buyuradigan mehmonlar uchun qulayliklar yaratib berish masalalarini hukumatimiz qo'llab-quvvatlayotgani haqida alohida takidlab o'tishdi. 

Suhbatda Xalqaro tashkilot vakillari musobaqaning hozirgi vaziyatdan kelib chiqqan talablari bo'yicha atroflicha malumot berishdi. Unga ko'ra, hozirgi musobaqalarda muxlislarning tashrif buyurishi mumkin emas. 

Kechagi uchrashuv davomida muxlislar uchun alohida yo'l qilish va “Humo Arena”ning ikkinchi qavatini tomoshabinlarga, birinchi qavatni esa sportchi va delegaciyalarning boshqa vakillariga ajratish masalasi ko'rib chiqildi.

Bu taklif so'nggi qaror emas, albatta. Yaqin vaqt ichida hukumatimiz va xalqaro tashkilot mutasaddilari mazkur taklifni atroflicha o'rganib, bu borada yakuniy fikrni aytishadi. Maqsad esa muxlislar uchun imkon qadar haqiqiy sport atmosferasini yaratib berishdir.