Ikki bokschimiz kamar uchun jang qilish maqsadida Vetnamga jo'nab ketdi + FOTO

"Cocky Buffalo Promoutions" kompaniyasi 23 aprel kuni Vetnamning Xoshimin shahrida professional boks kechasini tashkil etadi. Mazkur oqshom doirasida promoushen bilan shartnomasi bor charm qo'lqop ustalarimiz Olimjon Nazarov (50,8 kg) hamda Abdurasul Ismoilov (61,2 kg) navbatdagi janglarini o'tkazadi.

Ismoilov (9-1, 5KO) filippinlik Arji Tokuero (13-5-3, 10KO)ga qarshi vakant bo'lib turgan WBO Oriental kamari uchun jang qiladi.

Nazarov (25-5 15KO) esa boshqa bir filippinlik bokschi Xerme Baloro (6-1, 4KO)ga qarshi ringga chiqadi. Ushbu jang hamyurtimizga tegishli WBO Oriental kamari uchun kechadi. O'ta engil vazn toifasida o'z janglarini o'tkazib kelayotgan Nazarov ayni paytda WBO reytingida 7-o'rinni egallab turibdi.

Malumot uchun, Olimjon Nazarov bundan avvalgi jangini o'tgan yilning 23 oktyabr kuni Janubiy Koreaning Seul shahrida filippinlik Maykl Mendoza (14-12-1-1, 4 KO)ga qarshi o'tkazgandi. O'shanda 12 raund to'liq davom etgan jangda hakamlar bir ovozdan 115:113 hisobidagi g'alabani Nazarovga taqdim etishgan edi.

Biroz avval Nabijon Ismanov va Baxtiyor Mahkamov boshchiligidagi bokschilarimiz Turkiyaning Istanbul shahriga jo'nab ketishdi. U erdan delegaciyamiz Vetnam davlatiga etib boradi.