27 iyu 06:52
Yangiliklar

Sport kurashlari

Ikki yunon-rum kurashchimiz jahon chempionati finalida!

Italiya poytaxti Rim shahri erkin, yunon-rum va ayollar kurashi bo'yicha o'smirlar (U 17) o'rtasidagi jahon chempionatiga mezbonlik qilmoqda.

Dunyo birinchiligining ikkinchi kuni yunon-kurashi bo'yicha bellashuvlar davom ettirildi. Biz uchun ahamiyatlisi, kecha kurashga kirishgan uch klassigimizdan ikki nafari finalgacha barcha raqiblarini engib, jahon chempionligi uchun gilamga chiqish imkoniyatini qo'lga kiritishdi.

45 kg vaznda kurashayotgan SHahzod Ro'zioxunov 1/4 finalda ozarbayjonlik Huseyn Savadovni 11-3, 1/2 finalda ruminiyalik Ionut Mereutani 9-0 hisobida dog'da qoldirdi. Bugun u oltin medal uchun bellashuvda ukrainalik Evgen Pokovbaga qarshi gilamga chiqadi.

51 kg vazn toifasida yurtimiz sharafini himoya qilayotgan Aytjan Xalmaxanov 1/8 finalda Amare Fetene (Isroil) 4-1, 1/4 finalda Vadat Gasimli (Ozarbayjon) 12-4, 1/2 finalda esa Anri Xozrevanidze (Gruziya) ustidan 8-0 hisobida ustun keldi. Uning bugun jahon chempionligi uchun kechadigan final uchrashuvidagi raqibi Muhammadrizo Golami (Eron) bo'ladi.

Afsuski, 71 kg vazndagi terma jamoamiz azosi Amirshoh Vahobov 1/16 finalda ukrainalik Maksim Radikka imkoniyatni boy (0-9) berib qo'ydi.