Intervyu. Svetlana Osipova: "Keyingi musobaqa qachon bo'lishini bilmasang ham qo'lni tushirish kerak emas!"

O'zbekiston taekvondo WT associaciyasi matbuot xizmati terma jamoamiz azosi, bir nechta xalqaro musobaqalar g'olibasi Svetlana Osipova bilan suhbatlashdi. 

- Karantin vaqtida uyda vaqtni qanday o'tkazdingiz? 

- Karantinda uyda yakka tartibda, onlayn tarzda mashg'ulotlarni davom ettirdik. Foydali ishlar bilan shug'ullandik. 

- Bunday sharoitda sport formani ushlab turish qiyin bo'lmadimi? 

- Davlatimiz va O'zbekiston taekvondo WT associaciyasi uy sharoitida mashg'ulot o'tkazish uchun barcha sharoitni yaratib berishdi. Onlayn tarzda murabbiylar bilan bog'lanib mashg'ulotlani davom ettirdik. 

- Taekvondochi uchun yakka holda shug'ullanish qanchalik qiyin?  

- Albatta bizning sportda mashg'ulot uchun sherik juda zarur. Ammo istak yuqori bo'lsa yakka holda ham sport formani saqlab qolish mumkin. 

- Karantindan keyingi dastlabki yig'in qanday o'tmoqda? 

- Yig'in yaxshi o'tmoqda. Asta-sekin oldingi ritmga qaytyapmiz. Rostini aytsam musobaqalarni juda ham sog'indik.

- Ayni paytda sportchilarimiz uchun qanday cheklovlar mavjud? 

- Yig'in vaqtida bazadan tashqariga chiqish mumkin emas. Sog'ligimizni asrash uchun tibbiy niqoblar va antiseptiklardan foydalanyapmiz. Bir so'z bilan aytganda karantin qoidalariga qatiy rioya qilinmoqda. 

- Navbatdagi musobaqa qachon va qaerda bo'lishi nomalum bo'lib turibdi. Bu mavhum vaziyatda ham mashg'ulotlarni davom ettirish uchun qandaydir motivaciya bormi? 

- Baribir bu holat bir kun tugaydi. O'shanda oldingi sport hayotiga qaytamiz. Hatto keyingi musobaqa qachon bo'lishini bilmasang ham qo'lni tushirish kerak emas, terma jamoa safida ekanliging uchun ham ishlashda davom etish lozim!

O'zbekiston taekvondo WT associaciyasi matbuot xizmati