Israel Adesanya ilk bor kechagi mag'lubiyatiga izoh berdi

UFC 293 turnirining markaziy jangida endilikda sobiq o'rta vazn chempioni Israel Adesanya davogar SHon Striklendga ochkolar hisobiga ko'ra imkoniyatni boy berib qo'ygan edi. CHempionlik kamarini boy bergan Adesanya mag'lubiyatiga izoh berdi. 

"Mening rejalarim boshqacha edi. Lekin hayot bizga hamisha syurprizlar, yani kutilmagan holatlarni taqdim etib keladi. Bugun g'alaba qozonamanmi yoki mag'lub bo'lamanmi, har qanday holatda ham ko'p gapirmaslikka qaror qilgandim. Bugun men o'zimdan kuchliroq bo'lgan jangchiga yutqazdim. U bugun mendan kuchli edi. Hozir men haqimda qayg'uradigan insonlar, jamoam bilan ko'proq bo'lmoqchiman. Ular meni kutishyapti. SHu bois hozir ularning yoniga borishim kerak. Lekin o'rnimga mendan aqlliroq bo'lgan murabbiyim Yujin Beyrmanni qoldirib ketaman. Ishonchim komil, u buni uddalaydi. Qolgan savollarni unga berishingiz mumkin. Men esa xordiq chiqarishim, keyin nonushta qilishim va asosiy etiborimni oilamga qaratishim kerak", - dedi Adesanya UFC 293 turniridan keyingi matbuot anjumanida. 

Israel matbuot anjumanini tark etganidan bir necha daqiqa o'tib, o'zining ijtimoiy tarmoqdagi sahifasida xabar qoldirdi. 

"Menda hammasi joyida. Yutqazishni yomon ko'raman, lekin yashashni emas. Avval oilam bilan gaplashaman, keyin insonlarga yuzlanaman. Lekin hozir shaxsiy hayotimga etibor qaratishim kerak", - deya fikrini izohlagan Adesanya.