Isroil Madrimov Soro bilan jang, keyingi rejalari va oila qurayotgani haqida gapirdi

Bugun tongda bokschimiz Toshkent xalqaro aeroportida tantanali kutib olindi. SHundan so'ng, Isroil Madrimov Soroga qarshi jang va kelgusi rejalar haqida fikrlarini bildirib o'tdi:

"Durang natija bo'lishini hech kim kutmagandi, bunaqa holat sportchilarimiz orasida ham, o'zimni faoliyatimda ham birinchi marotaba kuzatilmoqda. Professional boksda mana shunday qoida bor va bunday holat texnik durang deya hisoblanadi.

Ammo men xursandman. Nega? Sababi birinchi jangimdan ko'ra men ancha tajriba yig'ib olgan edim va ikki raund tushgan bo'lsam ham o'zimga ishonch bilan harakat qildim. Xudo xohlasa, kutib qolamiz WBA yo'nalishida chempionlik jangiga imkoniyat berishsa, yaxshi bo'lardi. 

Bu jangga to'rt oy davomida tayyorgarlik ko'rgandik va 12 raundlik jangga tayyor edim. Ikkinchi raunddan keyin imkoniyat men tarafda edi, shuning uchun keyingi yoki undan keyingi raundda jang yakunlanishi ham mumkin edi. Xudo xohlasa, qarorni kutamiz va tajribamni oshirib, chempionlik uchun harakat qilaman. 

Soro bilan keyingi jang ehtimoli haqida...

"Endi bu narsani aniq ayta olmayman. CHunki bu WBA yo'nalishidagilarga bog'liq, lekin iloji boricha chempionlik jangiga harakat qilsak kerak deb o'ylayman. Sababi bu narsani cho'zib bo'lmaydi. Boshqa yo'nalishlarda talabgorlarning borligi tufayli, oraliq vaqt juda uzoq bo'lib ketadi deb bilaman".

SHuningdek, Isroil Madrimov oila qurayotganini tasdiqladi:

"InshaAllah yaqin kunlarda to'y harakatlarini boshlaymiz. Uylanish vaqti keldi, umrni qolgan qismini jufti halolim bilan chiroyli davom ettirish niyatidaman", - dedi Madrimov. 

 Olamsportcom tahririyati Isroil Madrimovga baxt tilab qoladi.