Jahon chempionatining birinchi kun oltin medallari Yaponiya va Italiyaga ketdi

Erkaklar o'rtasidagi -60 kg vazn toifasida yaponiyalik Ryuju Nagayama faoliyatida ilk bor jahon chempioniga aylandi. U final bellashuvida franciyalik Romen Valade-Pikarni mag'lubiyatga uchratdi. Bronza medallar mo'g'ulistonlik Yolk Kazirbek hamda IJF bayrog'i ostida kurashayotgan rossiyalik Ayub Blievga nasib etdi. 

Ayollar o'rtasidagi -48 kg vazn toifasida Assunta Skutto jahon chempioni bo'ldi. Italiyalik dzyudochi final bahsida qozog'istonlik Abiba Abujakinovadan ustun keldi. Ispaniyalik Laura Martines va yaponiyalik Koga Vakana bronza medallariga ega chiqishdi. Abujakinova 1/2 finalda aynan yapon dzyudochini mag'lub etgandi.   

Malumot uchun, 1997 yil Toshkentda tug'ilib, 2016 yilda Qozog'istonga ko'chib o'tgan Abiba uchun bu jahon chempionatlarining uchinchi medali bo'ldi. U 2022 yil Toshkent, 2024 yil esa Abu-Dabida o'tkazilgan jahon chempionatlarida bronza medalini qo'lga kiritgandi. Osiyo chempionatlarining ikki karra kumush medali sohibasi bo'lgan Abujakinova Xanchjou-2022 Osiyo o'yinlarida ham vice-chempionga aylangan edi. Abiba 2015 yilda O'zbekiston terma jamoasi safida o'smirlar o'rtasida Osiyo Kubogi g'olibi bo'lgan.