Jahon chempionatining ilk kunidagi eng yaxshi natijamiz 5-o'rin bo'ldi

Ushbu nufuzli musobaqada O'zbekiston yoshlar terma jamoasi deyarli to'liq (birgina +78 kg vaznda bizdan sportchi qiz yo'q) tarkib bilan ishtirok etyapti. Erkaklar o'rtasidagi +100 kg, ayollarda esa -57 kg vaznda O'zbekistondan ikki nafardan dzyudochi tatamiga chiqadi.  

Jahon chempionatida o'g'il bolalar -60, -66, -73, -81, -90, -100, +100 kg, qizlar esa -48, -52, -57, -63, -70, -78 hamda +78 kg vazn toifalarida tatamiga chiqishadi. Kecha jahon chempionatiga qura tashlash marosimi bo'lib o'tdi. 

Kecha jahon chempionatining birinchi kunida jami 4 ta vazn toifasida medallar uchun bellashuvlar tashkil etildi. O'zbekistonlik dzyudochilardan eng yaxshi natijaga -66 kg vazn toifasida yurtimiz sharafini himoya qilgan Dilshodbek Yo'ldoshev erishdi. U bronza medali uchun kechgan bahsda avvaliga qozog'istonlik Ermek Amangeldini mag'lub etdi. Keyin esa braziliyalik Marselinoga yutqazib qo'ydi va 5-o'rin bilan kifoyalandi. 

-60 kg vazndagi dzyudochimiz Bobur Badjiev ilk bosqichda yaponiyalik Ken Suemacuga, -48 kg vazn toifasidagi vakilamiz Yulyana Masketbaeva marokashlik CHaymay Eddinariga imkoniyatni boy berdi. -52 kg vazndagi Sita Qadamboeva vengriyalik Timea Kardoshdan ustun keldi. Lekin uchinchi davrada mo'g'ulistonlik Sosorbaram Lxagvasurenga yutqazib qo'ydi.