Jizzaxda sport gimnastikasi bo'yicha birinchi onlayn musobaqa o'tkaziladi

Ushbu musobaqa Jizzax viloyatida sport gimnastikasini yanada rivojlantirish va ommalashtirish, o'sib kelayotgan yosh avlodni sog'lom va barkamol qilib tarbiyalashga ko'maklashish, bolalarni uy sharoitida muntazam ravishda sport gimnastikasiga jalb qilish maqsadida tashkil etiladi. 

Jizzax viloyati jismoniy tarbiya va sport boshqarmasi tomonidan o'tkazilayotgan sport gimnastikasi bo'yicha birinchi onlayn musobaqa 15 iyundan 17 iyunga qadar har kuni soat 8:00 dan 17:00 gacha bo'lgan vaqt oralig'ida bo'lib o'tadi. G'olib va sovrindorlarni taqdirlash marosimi esa 18 iyun kuni tashkil etiladi.

Mazkur musobaqada 2004-2013 yillarda tug'ilgan hamda Jizzax viloyatida istiqomat qiladigan yosh gimnastlar qatnashishi mumkin.

Musobaqa tashkilotchilari: Jizzax viloyati jismoniy tarbiya va sport boshqarmasi, viloyat Gimnastika sport turlariga ixtisoslashtirilgan bolalar-o'smirlar sport maktabi hamda O'zbekiston gimnastika federaciyasining Jizzax viloyat hududiy bo'limi.

G'olib sportchilarga diplom va esdalik sovg'alari tashkilotchilar tomonidan karantin qoidalariga rioya etilgan holda uy manzillariga etkazib beriladi. Ishtirokchilar o'z chiqishlari yozib olingan videolavhalarni joriy yil 17 iyun kuni soat 17:00ga qadar +99890-538-86-61 telefon raqamidagi telegram manziliga yuborishlari mumkin.