Kamronbek Qadamov jahon chempioni! Nodirbekda kumush, Umidjonda bronza FOTOGALEREYA

Ushbu nufuzli musobaqada O'zbekiston terma jamoasi kurashchilari har uchchala yo'nalishda yurtimiz sharafini himoya qilyaptilar. Bugun erkin kurashchilar o'z ishtiroklarini yakunlashdi. Kechagi saralash bellashuvlarida Latif Xalimov va Asror Xo'jamurodov murabbiyligidagi erkin kurashchilarimizdan uch nafari jahon chempionatining medallari uchun gilamga chiqish imkoniyatini qo'lga kiritishgandi. 

Quvonarlisi, 60 kg vazn toifasida yurtimiz sharafini himoya qilgan Kamronbek Qadamov finalda hindistonlik Jaskaran Singhni 6-2 hisobida mag'lub etib, jahon chempioniga aylandi. U finalga qadar quvaytlik Abdulla Rashid (10-0), vengriyalik Aleks Gombosh (12-6) va turkiyalik Baris Unsalni mag'lub (9-0) etgan edi. 

Nodirbek Jumanazarov (51 kg) finalda eronlik Ali Mahmud Xorramdelga 0-2 hisobida yutqazib, jahon chempionatining kumush medalini qo'lga kiritdi. Nodirbek finalgacha belaruslik Vladislav Zuyko, AQSH vakili Natanael Jon Jesuroga hamda armanistonlik Tigran Buniatyandan ustun kelgandi. Yana bir kurashchimiz Umidjon Iskandarov (45 kg) esa bronza medali uchun kechgan bellashuvda ozarbayjonlik Yusif Isparovga hech qanday imkoniyat qoldirmadi - 11-1. Umidjon yarim finalda amerikalik jahon chempioni Uilyam Bassettga yutqazib qo'ygan edi.