Kannonir "Robokop"ni nokaut qildi. UFC Fight Night 251 turnirining barcha natijalari bitta sahifada

Oqshomning asosiy jangida o'rta vazn toifasida UFC chempionlik kamari uchun sobiq davogar amerikalik Jared Kannonir braziliyalik Gregori Rodrigesni to'rtinchi raundda nokautga uchratdi. Bu bilan Jared "Robokop"ga Top-15 reytingiga kirib olish uchun imkoniyat bermadi. 

Qizig'i, birinchi raundda ikki bor nokdaun holatiga tushib qolgan Jared qiyin vaziyatdan chiqib keta oldi. G'alabasi evaziga Jared Kannonir ikki mag'lubiyatli seriyasini yopib ketdi. Gregori Rodriges esa aksincha, oxirgi to'rtta jangida birinchi mag'lubiyatini qabul qilib oldi. 

Turnirning ko-meynivent jangida yarimengil vazn toifasi vakili amerikalik Yussef Zalal Top-15 divizioniga kirib olish uchun katta qadam tashladi. Katta ehtimol bilan u yangilangan reytingda o'n beshtalikka kirib oladi. U hakamlarning yakdil qarori bilan tajribali vatandoshi, reytingda 10-o'rinni egallab turgan Kelvin Kattarni taslim etdi.

Oqshomning nufuzi bo'yicha uchinchi jangida o'rta vazn toifasi vakillari Edmen SHaxbazyan va Dilan Budka o'zaro oktagonda to'qnash kelishdi. Amerikaliklar o'rtasidagi ushbu to'qnashuvda Edmen raqibini birinchi raundning ikkinchi daqiqasidayoq texnik nokautga uchratdi. 

SHuningdek, bugungi turnirda Nazim Sadixov, Xose Delgado, Gabriel Bonfim va Valter Uoker ham raqiblarini muddatidan avval mag'lub etdi.

UFC Fight Night 251 turnirining barcha natijalari:

Jared Kannonir Gregori Rodriges texnik nokautga uchratdi – 4-raund, 0:21.

Yussef Zalal ochkolar bo'yicha Kelvin Kattarni engdi (29-28, 29-28, 29-28).

Edmen SHaxbazyan Dilan Budkani texnik nokautga uchratdi – 1-raund, 1:35.

Nazim Sadixov Ismael Bonfimni texnik nokaut evaziga engdi (shifokor tavsiyasiga ko'ra to'xtatildi) – 1-raund, 5:00.

Andre Petroski Rodolfo Vieyrani ochkolar hisobi bilan yutdi (29-28, 29-28, 29-28).

Xose Delgado Konnor Mettyusni nokautga uchratdi – 1-raund, 2:58.

Anjela Xill raqibasi Ketlin Souzadan ochkolar bo'yicha ustun keldi (29-28, 28-29, 29-28).

Rafael Estevam Xesus Agilarni ochkolar hisobiga ko'ra mag'lub etdi (29-28, 29-28, 29-28).

Gabriel Bonfim Xaos Uilyamsni texnik sabmishn evaziga engdi (Brabo bo'g'ishi) – 2-raund, 4:58.

Elayj Smit Vins Moralesni hakamlarning yakdil qarori bilan yutdi (29-28, 29-28, 29-28).

Valter Uoker DonTel Maysni sabmishn evaziga taslim etdi – 1-raund, 1:17.

Jaklin Kavalkanti raqibasi Juliya Avilani ochkolar bo'yicha mag'lubiyatga uchratdi (30-27, 30-27, 30-27).