Karate. A seriyadagi eng yaxshi natijamiz 9-o'rin, Qozog'iston 4ta medal oldi

Zalcburg tatamilarida O'zbekiston terma jamoasi azolari ham kata va kumite bahslarida o'z imkoniyatlarini sinovdan o'tkazishdi. Avstriyadagi turnir Tokio Olimpiadasiga muhim licenzion ochko berishi bilan ahamiyatli edi. 

Afsuski, bu galgi musobaqadan ham sportchilarimiz medalsiz qaytishdi. Bu safar terma jamoa murabbiylari turnirga zaxira sportchilarini olib borishdi. Ikkinchi tarkib vakillari o'zlari uchun bildirilgan ishonchni oqlashmadi. 

Zalcburgdagi eng yaxshi natijamiz - 9-o'rin bo'ldi. -75 kg vazn toifasida yurtimiz sharafini himoya qilgan Jahonshoh Ibragimov A Seriya musobaqasida 9-o'rinni egalladi. -67 kg vazndagi yurtdoshimiz Asilbek Madaminov 13-o'rin bilan kifoyalandi. 

Etiborga molik jihati shundaki, Qozog'iston terma jamoasi ushbu turnirda 4ta medal (1ta oltin, 3ta bronza)ni qo'lga kiritdi. -60 kg vazn toifasida Darxan Assadilov barcha raqiblarini engib, oltin medalga ega chiqdi. Bu vaznda bizning birinchi raqamli sportchimiz Sadriddin Saymatov hisoblanadi. Qayd etish lozimki, qo'shnilarimiz mazkur turnirda 32 nafar sportchi bilan ishtirok etishdi.

Turnirda ishtirok etgan karatechilarimiz:

-60 kg: SHerzod Rahimqulov va Bekzod Tuyg'unov;

-67 kg: Asilbek Madaminov va Akmal CHoriev;

-75 kg: Jahonshoh Ibragimov;

-84 kg: Abdulaziz Atabaev;

-68 kg: Dildor Annadurdieva;

Kata: Hamdamjon SHodibekov