Karate. Hamyurtlarimizning Premer-ligadagi muvaffaqiyati

Karateda Premer-Liga musobaqasi Jahon Kubogi hisoblanib, 5ta bosqichdan iborat bo'ladi. Bu yil ushbu bahslarga Parij (Franciya), Rotterdam (Gollandiya), Dubay (BAA), Rabat (Marokash) va Leypcig (Germaniya) shaharlari mezbonlik qildi.

Jami 10ta vazn (5ta erkaklar, 5ta ayollar) toifasida o'tkazilgan Premer-liganing yakka va jamoaviy kumite bahslarida 18 yoshdan katta sportchilar tatamiga chiqishdi. Ushbu musobaqalar tizimi sportchilarga Tokio-2020 Olimpiadasiga muhim reyting ochkolarini berishi bilan ahamiyatli edi.

Leypcigdagi yakuniy bosqichda 87ta davlatdan jami 1384 nafar sportchi ishtirok etdi. Bu ushbu musobaqalar uchun rekord ko'rsatkich hisoblanadi. Ular orasida O'zbekiston milliy karate federaciyasi karatechilari ham bor edi.

Hamyurtlarimizdan talabalar o'rtasida jahon chempionati bronza medali sovrindori bo'lgan Dostonbek Otabolaev finalgacha mag'lubiyatsiz etib borib, kumush medal bilan taqdirlandi. U musobaqada 7ta jang o'tkazib, shularning 6tasida g'alaba qozondi. Finalgacha italiyalik Rabii Jendubini 6:4, belgiyalik Sam Plompenani 2:0, Osiyo chempioni qozog'istonlik Ermek Aynazarovni 1:0, yaponiyalik Yuta Morini 4:2, jahon va Evropa chempionatlari sovrindori germaniyalik Noa Bicsha hamda turkiyalik Fotix Senni hakamlar qaroriga ko'ra mag'lub etdi. Finalda esa Otabolaev karate afsonasi, bir necha karra jahon va Evropa chempioni italiyalik Luiji Busaga 1:3 hisobida yutqazib qo'ydi.

Musobaqada ikki sportchi bilan ishtirok etgan terma jamoamiz yakunda Qozog'iston (25 nafar qatnashchi), Eron (19), Angliya (23), Franciya (82), Polsha (31) kabi jamoalarni ortda qoldirib, 13-o'rinni egalladi.