Karatechilarimiz Dubaydan quruq qo'l bilan qaytishdi. SHunga o'rganib qolmayapmizmi?

Ushbu nufuzli musobaqada dunyoning 86 mamlakatidan 737 nafar karatechi sovrinli o'rinlar hamda Olimpiya reyting ochkolari uchun bahs olib bordi. Bellashuvlarda O'zbekiston terma jamoasi azolari ham ishtirok etdilar.

Afsuski, avvalgi Premer Liga musobaqalarida bo'lgani kabi bu safar ham hech bir sportchimizga shoxsupaga ko'tarilish nasib qilmadi. Sadriddin Saymatov, Dostonbek Otabolaev, Barno Mirzaeva singari tajribali sportchilarimiz o'zlariga bildirgan ishonchni oqlay olishmadi.  

2017 yili -60 kg vazn toifasida dunyoning eng yaxshi karatechisi bo'lgan Saymatov Dubay turnirida 11-o'rin bilan kifoyalandi. Uning vaznida bir yo'la ikki qozog'istonlik sportchi shoxsupaga ko'tarildi. Darxan Assadilov oltin, Qaysar Alpisbay bronza medalini qo'lga kiritdi. Aynan Saymatovning 11-o'rinni egallagani BAA turniridagi eng yaxshi natijamiz bo'ldi. 

SHu o'rinda haqli savol tug'iladi: musobaqalardan medalsiz qaytishga o'rganib qolmayapmizmi? Tokio Olimpiadasiga esa hech qancha vaqt qolgani yo'q. Karate ilk bor to'rt yillikning eng nufuzli musobaqasi dasturiga kiritilgan. Bu ketishda Olimpiada-2020ning karate musobaqasi o'zbekistonlik sportchilarsiz o'tadi, shekilli.  

Terma jamoamiz Dubayda quyidagi tarkibda qatnashdi:

Erkaklar:

-60 kg: Sadriddin Saymatov

-67 kg: Iqboljon Uzoqov

-67 kg: Sanjar Abdukarimov

-75 kg: Dastonbek Otabolaev

Ayollar:

-50 kg: Bahriniso Boboeva

-61 kg: Barno Mirzaeva

Murabbiylar: O'ktam Bekpo'latov, Dilnoza Bakirova

Suratda - Bahriniso Boboeva (Osiyo o'yinlari kumush medali sovrindori)