Karatechilarimiz karantindan so'ng navbatdagi o'quv-mashg'ulot yig'iniga kirishdi

Ushbu yig'in boshlanishidan avval terma jamoamizning har biri vakili Milliy olimpiya qo'mitasi qoshidagi Respublika sport tibbiyoti ilmiy-amaliy markazi mutaxassislari tomonidan chuqurlashtirilgan tibbiy ko'rikdan o'tkazildi. Tekshiruv jarayonida sportchilardan COVID-19 uchun, shuningdek, mobil laboratoriya tahlillari ham olindi.

Takidlash joiz, mazkur o'quv-mashg'ulot yig'inida 12 nafar karatechilarimiz ishtirok etadi va ular ushbu mashg'ulotlarni bosh murabbiy Dilnoza Bakirova va katta murabbiy O'ktam Bekpulatov boshchiligida olib borishadi. Sportchilarning salomatligini nazorat qilish masuliyati federaciya shifokori Baxriddin Axmedov va massajchi Husan Turg'unovlarda bo'ladi. Mashg'ulotlar 29 sentyabr kuniga qadar davom etadi.

“Ushbu o'quv-mashg'ulot yig'ini bizga suv va havodek zarur, chunki sportchilarimiz 5 oydan ko'p vaqt mobaynida o'z uylarida noqulay sharoitda mashg'ulot o'tkazishdi. Biz yig'in o'tkazadigan ushbu kunni uzoq vaqt kutdik. Mana, nihoyat yana birgalashib, mashg'ulotlarni o'tkazamiz. Biz birinchi mashg'ulotda juda ko'p ham yuklama bermaymiz, asosiy etiborni tiklanishga karatamiz”, – dedi Dilnoza Bakirova.