Kasimero – Ahmadaliev jangi Murodjon uchun qanchalik ahamiyatga ega? Ehtimoliy to'qnashuv tahlili

Garchi hozircha mazkur to'qnashuv bo'yicha rasmiy kelishuv mavjud bo'lmasa-da, ehtimoliy jang sharq mamlakatining boks muxlislarida katta qiziqish uyg'otmoqda.

Kasimero uchun katta imkoniyat

37 yoshli Kasimero professional faoliyati davomida uch vazn toifasida jahon chempioni bo'lishga, o'z hisobiga 36 ta g'alaba, 5 ta mag'lubiyat va 1 ta durangni yozdirib qo'yishga muvaffaq bo'lgan. Qahramonimiz so'nggi jangini 6 iyun kuni Yaponiyada meksikalik taniqli Luis Neriga qarshi o'tkazib, nokaut bilan g'alaba qozongandi. Uning asosiy afzalliklari tajriba, kuchli zarba va jang davomida raqibga bosim o'tkazish qobiliyati hisoblanadi.

So'nggi yillarda Kasimero ham boshqa bokschilar, jumladan, hamyurtimiz Murodjon Ahmadaliev singari asosiy etiborini Naoya Inoue bilan jang qilishga qaratdi, ammo turli sabablarga ko'ra bu to'qnashuv amalga oshmadi. SHu bois filippinlik bokschi uchun Ahmadalievga qarshi jang katta reyting va moliyaviy imkoniyatlar taqdim etishi mumkin, deb qaralmoqda.

Ahmadaliev nima uchun favorit?

Murodjon Ahmadaliev bugungi kunda ikkinchi eng engil vaznning eng kuchli va texnik jihatdan mukammal bokschilaridan biri hisoblanadi. O'zbekistonlik bokschi jang davomida yuqori tempda harakat qilishi, zarbalar kombinaciyasi va chap qo'lli bokschilarga xos noqulay uslubi bilan ajralib turadi. Garchi bu uslub Inouega qarshi jangda "o'tmagan" bo'lsa-da.

Kasimero tajribali bo'lishiga qaramay, yosh va jismoniy tayyorgarlik borasida ustunlik Ahmadaliev tomonida bo'lishi mumkin. Ayniqsa, yurtdoshimizning so'nggi janglarini muddatidan avval emas, to'liq masofada o'tkazishga urinayotgani bu aynan kardio masalasi bilan bog'liq ekani aniq.

Uslublar to'qnashuvi

Ehtimoliy jangda muxlislarni qiziqtiradigan jihatlardan biri — ikki sportchining mutlaqo turlicha uslublaridir.

Kasimero ko'proq kuchli yakka zarbalarga tayanadi va raqibni xato qilishga majbur qilishni yaxshi ko'radi. Ahmadaliev esa harakatchanlik, tezkor kombinaciyalar va ochkolar yig'ish orqali ustunlikka erishadi.

SHu sababli jangning dastlabki raundlarida tashabbus uchun kurash hal qiluvchi ahamiyat kasb etishi mumkin. Agar Kasimero erta nokaut imkoniyatini topa olmasa, keyingi raundlarda ustunlik bokschimiz tomoniga o'tishi ehtimoli yuqori.

Jang qanchalik ahamiyatga ega?

Ayni paytda mazkur to'qnashuvning amalga oshishi bir nechta omillarga bog'liq. Birinchi navbatda, Ahmadaliev chempionlik kamarlari bilan bog'liq katta janglarga davogarlardan biri bo'lib turibdi. U o'z vaznini yarim engil divizionga o'tkazishni ham istisno qilmayapti va oxirgi jangini aynan 57 kg vazn toifasida o'tkazgani ahamiyatga molik. SHuning uchun, Murodjonning jamoasi reyting nuqtai nazaridan yuqoriroq ahamiyatga ega raqiblarni tanlashi ehtimoli baland.

Biroq, Kasimero katta nom va tajribaga ega ekanini hisobga olsak, bu jang muxlislar qiziqishi nuqtai nazaridan qiziqarlidek ko'rinishi mumkin.