“Katta Dubulg'a”ni o'tkazib yuboradigan taniqli vakillarimiz va musobaqaga yangi qo'shilgan yulduzlar

Ayni paytga kelib turnir uchun talabnomalarni qabul qilish vaqti yakunlandi. Xalqaro dzyudo federaciyasi saytidagi malumotga ko'ra, musobaqada ishtirok etish uchun 73 davlatdan 521 dzyudochi ro'yxatdan o'tgan. SHu o'rinda O'zbekiston terma jamoasining 50 nafardan ortiq vakillarini ham uchratish mumkin. 

Reglamentga ko'ra, musobaqa mezboni har vaznga 4 nafardan vakilini kiritish imkoniyatiga ega. Bunday imkoniyatdan jamoamiz deyarli to'liq foydalanmoqda va 51 nafar dzyudochimiz ro'yxatdan o'tkazildi. Ular orasida bazi kutilgan va kutilmagan nomlarni ham uchratish mumkin.

Musobaqani o'tkazib yuboradigan dzyudochilarimiz orasida Diyorbek O'razboev, SHahram Ahadov, Muhammadkarim Xurramov, Bekmurod Oltiboev kabi taniqli vakillarimiz bor. Rio-2016 Olimpiadasi sovrindori O'razboev Tel-Aviv turniridan so'ng -66 kg vazn toifasiga o'tishga qaror qildi va hozir yangi vazn toifasiga to'la tayyor bo'lmagani uchun yoshlarga imkon berilmoqda.

-73 kg vaznga o'tgan SHahram Ahadov tizzasidagi jarohatidan to'liq forig' bo'lmagani uchun musobaqani o'tkazib yuborsa, Isroilda kichik jarohat olgan Xurramov hozirda tiklanish davrida. Afsuski, musobaqa boshlanishiga bir necha kun qolganida og'ir vaznli polvonimiz Bekmurod Oltiboev qo'lidan jarohat olib jamoamiz “lazaret”iga tushdi.

SHu o'rinda uzoq tanaffusdan so'ng Yaponiya jamoasi ham musobaqalarga qaytayotganini alohida takidlash joiz. Kunchiqar yurt vakillari 11 nafar dzyudochi bilan Toshkentga tashrif buyurishadi va ularning 5 nafari Olimpiya o'yinlarida ishtirok etadigan tarkib dzyudochilaridir. SHuningdek, so'nggi kunlarda ro'yxatga kiritilgan italiyalik Olimpiada chempioni Fabio Basile ham “Humo arena”da kurashadi.