“Keles Open” turnirida mezbonlar birinchi bo'lishdi + FOTO

Mamlakatimizning har bir hududida mazkur sport bilan oshno bo'lgan yoshlar soni ko'pchilikni tashkil etadi. Turli ko'rinishdaga bellashuvlar esa har doim shiddatli va jozibakor tarzda o'tkaziladi.

Prezidentimiz tomonidan ilgari surilgan beshta muhim tashabbusning ikkinchi tashabbusi ijrosini taminlash maqsadida Toshkent tumani bolalar-o'smirlar sport maktabiga qarashli “Universal” sport majmuasida karate WKF bo'yicha o'tkazilgan “Keles-Open” musobaqasi ham xuddi shunday bo'ldi.

Yuqori saviyada tashkil etilgan mazkur ochiq turnirda Qoraqalpog'iston Respublikasi, Toshkent shahri, Namangan, Andijon, Farg'ona, Xorazm hamda Toshkent viloyatidan tashrif buyurgan 400 nafarga yaqin o'g'il-qizlardan iborat yosh sportchilar ikki kun davomida g'oliblik uchun kuch sinashishdi.

Musobaqaning yakuniy natijalariga ko'ra, umumjamoa hisobida faxrli birinchi o'rinni Toshkent viloyati jamoasi qo'lga kiritgan bo'lsa, ikkinchi o'rinni Toshkent shahri egalladi. Uchinchi o'rin Qoraqalpog'iston yoshlariga nasib etdi.

Takidlash joiz, umumjamoa hisobida birinchi o'rinni qo'lga kiritgan Toshkent viloyati jamoasi orasida 30 nafardan ortiq sportchilar aynan Toshkent tumani yoshlari bo'lib, tuman turizm va sport bo'limi boshlig'i, Keles karate klubi rahbari, BO'SMning tajribali murabbiy Dilshod Yusupovning shogirdlari hisoblanadi va ularning 18 nafari oltin medalga ega chiqishdi. Uch nafari esa chempionlik kamarini o'zlariniki qilishdi.  

SHuningdek, musobaqa doirasida 12 ta vazn toifasida chempionlik kamari uchun ham bellashuvlar tashkil etildi. Quyidagi sportchilar o'z vazn toifalarida raqiblaridan ustun kelib, chempionlik kamarlariga ega chiqishdi. 

12-13 yoshlilar

40 kg. – Jumaniyoz Jumaniyozov (Toshkent sh.)

14-15 yoshlilar

52 kg. – Doston Xamroev ( Qoraqalpog'iston)

+54 kg. – Rohatoy Amitova (Toshkent v.)

57 kg. – Xojiaxror Ibrohimov (Toshkent sh.)

16-17 yoshlilar

61 kg. -  Mirafzal Mirsolixov (Toshkent sh.)

63 kg. – Samandar Oqbo'taev  (Toshkent sh.)

68 kg. – Samandar Mirhamidov (Toshkent v.)

+18 yoshlilar

55 kg. - Azizbek Islombekov ( Toshkent v.)

60 kg. – Hasan Axmadaliev  (Toshkent v.)

67 kg. – Feruz Ro'zmetov (Xorazm)

+67 kg. – G'ofur Zohidov (Toshkent v.)

Yakka kata yo'nalishi

+18 yoshlilar

Samandar O'rozaliev (Toshkent v.)

Musobaqa yakunlangach, taqdirlash marosimi tashkil etildi. G'olib va sovrindorlar Toshkent viloyati Turizm va sport boshqarmasi, Toshkent tumani hokimligi, tuman BO'SM va Keles karate klubi tomonidan diplom, medal va esdalik sovg'alari bilan mukofotlanishdi. 

Ilhom RAHMONOV tayyorladi