Kievdagi o'zbek derbisida G'ulomjonning qo'li baland keldi, Mahmudjon va Javrailda bronza + FOTO

O'z tarixida 24-marotaba tashkil etilayotgan musobaqada dunyoning yigirmadan ziyod davlati qatorida O'zbekiston terma jamoasi azolari ham har uchchala yo'nalishda yurtimiz sport sharafini himoya qilishyapti. Kecha musobaqaning ikkinchi kuni uch yo'nalishda ham bir nechtadan vazn toifasida g'olib va sovrindorlar aniqlandi. 

Xabar berganimizdek, -57 kg vazndagi erkin kurashchilar bahsida ikki hamyurtimiz finalga etib kelgandi. Oltin medal uchun kechgan bellashuvda G'ulomjon Abdullaev Nodirjon Safarovga qarshi gilamga chiqdi va 7:1 hisobida g'alaba qozondi. G'ulomjon oltin, Nodirjon esa kumush medalga sazovor bo'ldi. Ushbu vaznda ishtirok etgan yana bir hamyurtimiz Mahmudjon SHavkatov bronza medalini qo'lga kiritdi. U bronza uchun kechgan dramatik bahsda ukrainalik Taras Markovichdan 8:6 hisobida ustun keldi.    

Terma jamoamizga ikkinchi bronza medalini -86 kg vazndagi kurashchimiz Javrail SHapiev taqdim etdi. U bronza medali uchun kechgan bellashuvda slovakiyalik Boris Makoevga hech qanday imkoniyat qoldirmadi - 7:0. Hozircha erkin kurashchilarimiz hisobida 1 ta oltin, 1 ta kumush, 2 ta bronza medali bor.