Malika Xakimova: "Keyingi maqsad - Olimpiada oltin medali!"

Ushbu muvaffaqiyatdan so'ng qilichbozimiz www.olamsport.com sayti uchun o'z fikrlarini bildirib o'tdi. 

"Licenziya olishga ishongandim, chunki bu yo'lda juda ko'p mehnat qildik. Butun dunyoda kechayotgan vaziyat tufayli mening orzum yana bir yil ortga surildi, ammo yakunda bu men uchun eng yaxshisi bo'lib chiqdi! Aprel oyida Toshkentda bo'lib o'tadigan saralash musobaqalarida yo'llanmani qo'lga kiritaman deb o'ylagandim, lekin ko'rib turganingizdek barchasi oldindan ijobiy hal bo'ldi. Men jahon reytingidan o'tdim va bu o'zbekistonlik qilichbozlar orasida dastlabkisi hisoblanadi.

O'zimni ajoyib his qilyapman. Bu licenziya barchamizniki. Har qanday vaziyatda ham menga ishongan va birga ishlagan murabbiyim Ruslan Ravilevich Kudaevga, shuningdek, O'zbekiston Qilichbozlik federaciyasiga minnatdorchilik bildiraman. Albatta, terma jamoamizning barcha azolari licenziya olishlarini xohlayman, ularga bu yo'lda omad tilayman. Navbatdagi maqsadim - Olimpiada oltin medali", - dedi Xakimova muxbirimiz bilan suhbatda.

Malumot uchun, Malika Xakimova ayol qilichbozlarimiz orasida jahon reytingi orqali Olimpiya o'yinlariga yo'llanma olgan ilk sportchimizga aylandi. SHpagachimiz 2013 yil o'smirlar o'rtasida, 2014 yil esa kattalar o'rtasida Osiyo chempioni, kattalar o'rtasida Jahon kubogi sovrindori hisoblanadi.

Ilgari qilichbozlarimiz orasida 3 nafari Olimpiya O'yinlarida ishtirok etgan. Bugungacha rapirachimiz Rafkat Ro'ziev Atlanta-1996 Olimpiadasida, shpagachilarimizdan Anisa Petrova Sidney-2000, Ruslan Kudaev esa London-2012 Olimpiadasida ishtirok etishgan. Aprel oyida poytaxtimiz mezbonligidagi litcenzion musobaqa yakunida bunday sportchilarimiz soni yanada ortishiga umid qilamiz.

SARVINOZ RAXMONQULOVA suhbatlashdi