Matonat maktabi bu - mahorat maktabidir!

Yodingizda bo'lsa yurtboshimiz o'tgan yili Tokio Paralimpiya o'yinlarida munosib ishtirok etgan sportchilar bilan uchrashuv chog'ida Milliy paralimpiya qo'mitasi tarkibida “Matonat maktabi”ni tashkil etish tashabbusini ilgari surgandilar. 

Prezidentimiz o'z so'zlarida taqdir sinovlariga mardona bardosh berib, sabr-toqat va shukronalik ruhi bilan, hayotda munosib o'rnini topib, kerak bo'lsa Vatanimiz shanini ulug'lashda jasorat ko'rsatayotgan parasportchilar haqiqiy matonat va qahramonlik namunasi ekanligini takidlagandilar.

- Men Paralimpiyachilarning matonat maktabi faoliyatini tashkil etish chora-tadbirlari to'g'risidagi qarorni o'qib, juda xursand bo'ldim, - deydi O'zbekiston Paralimpiya qo'mitasi raisi, Osiyo Paralimpiya qo'mitasi vice-prezidenti Muxtorxon Tashxodjaev. - Paralimpiyachilar uchun matonat maktabining tashkil etilishi dunyoning hech bir mamlakati paralimpiya tarixida qayd etilmagan. Avvalari ruhiy tushkunlik, nima qilishini bilmay yurgan imkoniyati cheklangan insonlar hayot tarzi qiyin kechgan bo'lsa, endilikda matonat maktabi vakillari o'z hayotiy tajribalari, bosib o'tgan yo'llari xaqida respublikamiz bo'ylab barcha mahallalar, talim muassasalari yoshlariga so'zlab berishyapti va shu yo'l bilan ularni hayotda o'z o'rinlarini topishga undayaptilar. Bu juda masuliyatli hamda sharafli vazifa. Ruhi tetik, baland iftixor, g'ururi bor yoshlarni kamol topishida ko'mak berish bu paralimpiyachilarga bildirilgan yurt otasining ishonchidir. Bir so'z bilan aytganda, matonat maktabi bu - mahorat maktabidir.