MDH o'yinlari. Kechagi kun qanday o'tdi?

O'z tarixida ikkinchi bor o'tkazilayotgan ushbu nufuzli kompleks musobaqada O'zbekiston delegaciyasining jami 326 nafar sportchisi 22 ta sport turida yurtimiz sharafini himoya qilyapti. Kecha, 10 avgust kuni hamyurtlarimiz boks, muaytay, voleybol, zamonaviy beshkurash sport turlarida bahslarga kirishishdi. 

Jumladan, 63,5 kg vazn toifasida kurashgan muaytaychimiz Ilyosbek G'ulomjonov delegaciyamiz hisobiga bronza medalini qo'shib qo'ydi. Yana bir vakilimiz Davlat SHamsiev (60 kg) rossiyalik, Abdulfattoh Aliakbarov (71 kg) turkmanistonlik raqibini mag'lub etib, yarim finalga yo'l oldi.

Voleybol bo'yicha yoshlar terma jamoamiz Armanistonni 3:0 hisobida mag'lub etdi. Bugun ular Belarus terma jamoasiga qarshi parketga chiqishadi. Zamonaviy beshkurash bo'yicha terma jamoamiz musobaqadagi ishtirokini medalsiz yakunladi. Kechadan Brest shahrida suzish bo'yicha bahslar ham start oldi. 

Bokschilarimizdan Samandar Olimov (54 kg) tojikistonlik, Abdulloh Madaminov (60 kg) rossiyalik, Boburbek Bobojonov (63,5 kg) rossiyalik, SHavkatjon Boltaev (71 kg) rossiyalik, Fazliddin Erkinboev (75 kg) rossiyalik, Abdulaziz Abdurahmonov (80 kg) rossiyalik, Xalimjon Mamasoliev (92 kg) tojikistonlik raqibini mag'lubiyatga uchratib, finalga yo'l olishdi.

Yarim finalda imkoniyatni boy berib qo'ygan Sobirjon Tastanov (48 kg), Miralijon Mavlonov (51 kg), SHohruh Abdumalikov (57 kg), Murodbek Bahriddinov (67 kg), Abdulaziz Abdurahmonov (86 kg), Ravshanjon Soliev (+92 kg) MDH o'yinlarining bronza medaliga ega chiqadigan bo'lishdi.