Mo'minjon Abdullaev Tokio Olimpiadasiga boradi!

Quvonarlisi, biroz avval yunon-rum kurashchimiz Mo'minjon Abdullaev yarim final uchrashuvida xitoylik Ling Je Menga qarshi gilamga chiqdi va raqibini 9-0 hisobida dog'da qoldirdi. Ushbu g'alaba Abdullaevga Tokio Olimpiadasi yo'llanmasini taqdim etdi. 

Malumot uchun, 130 kg vazndagi yunon-rum kurashchimiz ilk bellashuvda hindistonlik Navin Navindan 9-0, keyin qirg'izistonlik Roman Kimdan 4-0, uchinchi bahsida yaponiyalik Arata Sonodadan 9-0 hisobida ustun kelgan edi. 

Afsuski, 67 kg vazn toifasida yurtimiz sharafini himoya qilgan jahon chempionatining kumush medali sovrindori Aram Vardanyan 1/2 finalda koreyalik ikki karra jahon chempioni Xansu Ryuga yutqazib qo'ydi. Ryu o'z-o'zidan Olimpiada yo'llanmasini qo'lga kiritdi. 

Yana bir kurashchimiz, 97 kg vazn toifasidagi bellashuvlarda ishtirok etgan Jahongir Turdiev 1/4 finalda eronlik Muhammadhadi Saraviga imkoniyatni boy berdi. Endi 67 va 97 kg vazn toifalaridagi kurashchilarimiz kelasi oy Bolgariyada o'tkaziladigan so'nggi - jahon licenzion turnirida oxirgi imkoniyatdan foydalanadilar.