MOQ rahbari: “Zabelinskayaning mahorat saboqlarida men ham qatnashgan bo'lar edim”

Dastur doirasida bugun velosportchilarimiz bilan mashg'ulot olib borildi. Onlayn mashg'ulotda Olga Zabelinskaya, Murodjon Xolmuratov kabi taniqli vakillarimiz qatori yana 10 nafar sportchimiz qatnashdi. 

Mashg'ulotni velosport bo'yicha Olimpiya terma jamoasi murabbiyi Rustam Nurtdinov olib bordi. Jarayonni MOQ prezidenti Rustam SHoabdurahmonov, O'zbekiston velosiped sporti federaciyasi rahbariyati, MOQ mutasaddi vakillari, shifokor va murabbiylar kuzatib borishdi.

“Hozir barcha sport turlarida tajribali mutaxassislar bilan mahorat saboqlari olib borilmoqda. Velosportda ham Olganing boy tajribasidan foydalanib, viloyatlardagi sportchi va murabbiylar uchun ana shunday mahorat saboqlari tashkil qilsak bo'ladi. Bunda men o'zim kerak bo'lsa, velosiped olib qatnashgan bo'lar edim. O'ylaymanki, bunday ulkan tajribaga ega sportchi bilan o'tadigan master-klass qiziqarli o'tadi”, – dedi Rustam SHoabdurahmonov.

SHuningdek, MOQ rahbari suhbat davomida bayramona kayfiyat ulashish uchun yaqinlashib kelayotgan Mustaqillik bayramiga atab onlayn musobaqalar tashkil qilish bo'yicha o'z takliflarini bildirib o'tdi.