MOQ rahbariyati va Tezkor shtabi azolari O'zbekiston dzyudo federaciyasiga tashrif buyurishdi

Unda MOQ raisi R. SHoabdurahmonov, MOQ raisi o'rinbosari, O'zbekiston dzyudo federaciyasi raisi A.Kamilov, MOQ raisi o'rinbosari vazifasini bajaruvchi, Tezkor shtab rahbari SH.Tashmatov, Respublika sport tibbiyoti ilmiy-amaliy markazi direktori A.Sadikov, yakkama yakka kurash turlari bo'yicha ROSMM rahbariyati ishtirok etdi.

O'rganishlar chog'ida Tokio-2020 va Parij-2024 o'yinlariga tayyorgarlikning borishi masalasi muhokama qilindi. Dzyudochilarimiz Olimpiya o'yinlarida muntazam ravishda sovrindorlar safidan joy egallab kelishgani ham ulardan natija kutishga haqli ekanimizni anglatadi.

Pandemiya sharoiti bo'lishiga qaramasdan, mamlakat dzyudochilariga nufuzli musobaqalar oldidan o'quv-mashg'ulot yig'inlarini to'laqonli o'tkazishlari uchun barcha shart-sharoitlar yaratib berilgan. 

Xabaringiz bor, poytaxtimizdagi Dzyudo markazida Gruziya, Misr, Qirg'iziston terma jamoalarining etakchi sportchilari ishtirokida xalqaro o'quv-mashg'ulot yig'ini bo'lib o'tayotgan edi. 

Ayni paytda qirg'izistonlik dzyudochilar yig'inni yakunlab, o'z yurtiga qaytib ketishgan. Gruziya va misrlik polvonlar esa hamyurtlarimiz bilan mashg'ulotlarni davom ettirishmoqda.

MOQ rahbari terma jamoa murabbiylari va sportchilar bilan suhbatlashib, ularni qiynayotgan muammolar, reyting zonasidagi poziciyasi, asosiy raqiblari, texnik va taktik jihatdagi kamchiliklar, salomatligi borasidagi masalalar bilan qiziqdi. 

O'zaro savol-javoblar polvonlarimizning oldindagi musobaqalarga shay ekani, yo'llanmalar uchun kurashga tayyorligini ko'rsatdi.

Uchrashuv yakunida Tezkor shtab azolari sportchilarimizning kelgusi faoliyatiga omad tilashdi.