MPL 6 turnirining markaziy jangi rasman bekor qilindi, Mahmud Muradov bunga izoh berdi + To'liq kard

Xabaringiz bor, oqshomning markaziy jangi qirg'izistonlik Edil Esengulov hamda rossiyalik Xamzat CHapanov o'rtasida o'tkazilishi lozim edi. Ammo, jangga uch kun qolganida Edilning jarohat olgani malum bo'ldi. Tashkilotchilar Esengulovning o'rniga raqib topish uchun oxirigacha harakat qilishdi. Lekin bu urinishlar besamar ketdi. 

"Afsuski, markaziy jangni saqlab qola bilmadik. Edil jarohat oldim deb aytdi. Rostan jarohat oldimi yoki o'zi shunchaki jang qilgisi kelmadimi, ochig'i buni tushunmadim. Biz taklif bildirgan boshqa jangchilar Xamzat bilan jang qilishni istashmadi. SHu sababdan markaziy jangni karddan olishga majbur bo'ldik", - dedi promoushen rahbari Mahmud Muradov. 

Endi oqshomning markaziy jangi o'zbekistonlik ikki aralash yakkakurash ustasi o'rtasida bo'lib o'tadi. Nurmatov O'zbekovga qarshi oktagonga ko'tariladi. Ushbu oqshomda shuningdek Ahliddin Mirzadavlatov qirg'izistonlik Zaripbek uulu bilan jang qiladi. Turnirdan jami 14 ta jang o'rin olgan.   

Malumot uchun, ertaga, 8 iyul kuni soat 20:00da poytaxtimizdagi "Anhor-Lokomotiv" parkida Face to Face (ko'z urishtirish) hamda oqshom ishtirokchilarini tarozidan o'tkazish marosimlari tashkil etiladi.