Murodjon Ahmadalievning Marlon Tapalesga qarshi himoya jangi bo'yicha kelushivga erishildi

Bugun, 3 yanvar kuni IBF'ning Nyu-Jersidagi shtab-kvartirasida ikkinchi eng engil vazn toifasi (- 55 kg)da IBF va WBA kamarlari sohibi, o'zbekistonlik bokschi Murodjon Ahmadaliev (11-0) hamda filippinlik Marlon Tapales (36-3) ishtirokidagi chempionlik jangi uchun promouterlik savdosi o'tkazilishi lozim edi, biroq har ikki tomon bu borada o'zaro kelishuvga erishgach, aukcion bekor qilingan.

BoxingScene.com nashrining malum qilishicha, ikkala tomon ham moddiy tomonlama o'zaro kelishuvga erishgan. Jang sanasi va manzili hozircha malum emas. Ahmadalievning umumiy hisobda to'rtinchi himoya jangi 2023 yilning ilk choragi hamda aprel oyining so'ngida bo'lib o'tishi taxmin qilinmoqda.

Bokschilar o'rtasidagi jangni tashkil etish uchun promouterlik savdosi aslida 20 dekabr kuni o'tkazilishi kerak edi, biroq IBF har ikki tomon iltimosiga binoan uni 3 yanvar sanasiga qoldirgan edi.

Eslatib o'tamiz, Ahmadaliev 2022 yil iyun oyida amerikalik Ronni Rios (33-3)ni mag'lubiyatga uchratib, o'ziga tegishli WBA va IBF kamarlarini uchinchi bor muvaffaqiyatli himoya qilgandi. Tapales esa ohirgi jangini o'tgan yilning may oyida meksikalik Xose Estrella (23-19-1)ga qarshi o'tkazib, muddatidan avval g'alaba qozongan edi.