Muzaffar dzyudochilarimiz tantanali kutib olindi FOTOREPORTAJ

Yarim tun bo'lishiga qaramay, Islom Karimov nomidagi Toshkent xalqaro aeroportida o'tgan hafta qahramonlarini kutib olish uchun O'zbekiston Jismoniy tarbiya va sport vazirligi, Milliy olimpiya qo'mitasi, O'zbekiston dzyudo federaciyasi mutasaddilari, dzyudochilarimizning oila azolari, yosh dzyudochilar, keng sport jamoatchiligi hamda ommaviy axborot vositalari xodimlari hozir bo'lishdi.   

Eslatib o'tamiz, Tel-Aviv musobaqasida dunyoning 60 davlatidan jami 418 nafar dzyudochi turnir medallari hamda Tokio Olimpiadasi yo'lidagi muhim reyting ochkolari uchun tatamiga chiqdi. Ular qatorida O'zbekiston terma jamoasining 11 nafar azosi ham o'z imkoniyati va mahoratini sinovdan o'tkazdi. Dzyudochilarimiz Isroil turnirida 1 ta oltin, 2 ta bronza medali bilan yakunda umumjamoa hisobida 60 davlat orasida 8-o'rinni band etdi. SHarofiddin Boltaboev oltin medal va 1000 reyting ochkosiga ega bo'ldi. -60 kg vazn toifasidagi bellashuvlarda yurtimiz sharafini himoya qilgan Sardor Nurillaev va Muhriddin Tilovov esa bronza medali hamda 500 reyting ochkosini qo'lga kiritdi. 

Endi bor etibor 5-7 mart kunlari poytaxtimizdagi muhtasham "Humo" arena saroyida o'tkaziluvchi Toshkent "Katta Dubulg'a" turniriga tayyorgarlikka qaratiladi. Bo'lajak musobaqada O'zbekiston terma jamoasi har bir vazn toifasida 4 nafardan dzyudochisi bilan ishtirok etadi.