Namanganda NUR-HAS karate markazi tomonidan seminar o'tkazildi FOTOGALEREYA

NUR-HAS karate markazi tashabbusi bilan tashkil etilgan ushbu seminarda murabbiylar Mutal Nazarov va SHamsiddin Eshonov ushbu yakkakurash turi bilan shug'ullanayotgan yoshlarga nazariy va amaliy mashg'ulotlarni o'tab berishdi. Eshonov to'rt yil mobaynida Rossiya Federaciyasida tahsil olib qaytdi. SHundan so'ng tajribali murabbiy Hasan Nazarov qo'l ostida bilimlarini yanada boyitdi. Hozirda Namangan viloyati terma jamoasi bosh murabbiyi sifatida faoliyatini davom ettirmoqda. 

Ushbu seminardan ko'zlangan maqsad 14-15 oktyabr kunlari Yaponiya poytaxti Tokio shahrida o'tkaziladigan 13-jaxon chempionati hamda 23-24 sentyabr kunlari Toshkent shahri mezbonlik qiladigan "Mustaqillik kubogi"ga viloyat terma jamoasi azolari hamda nomzodlarini tayyorlash, ularning mahorat darajasini oshirishdan iborat.

"Kiokushinkay karate bilan Rossiya davlatida to'rt yil shug'ullanib, tahsil oldim. O'zbekistonga qaytib, "NUR-HAS" karate markazi asoschisi, ustoz sensey Hasan Nazarov qo'llarida malaka oshirdim. Hozirda Namangan viloyati bosh murabbiyi sifatida faoliyatimni davom ettiryapman. Bugungacha yigirmadan ziyod O'zbekiston chempionlari tayyorladim. Namangan viloyatining Kosonsoy shahrida yuzdan ortiq shogirdlarimga shinkiokushinkay karateni o'rgatib kelyapman", - deydi SHamsiddin Eshonov.

Bu kabi seminarlarni Respublikamizning boshqa viloyatlari va shaharlarida ham o'tkazish rejalashtirilgan.