Nodirjon Mirzahmedov "chopilganlar"ning navbatdagisi(mi?)

Kecha ijtimoiy tarmoqlarda - 48 kg vazn toifasida jang qiluvchi o'zbekistonlik bokschi Nodirjon Mirzahmedovning jahon chempionatida ishtirok etuvchi tarkibdan noxaq chiqarib yuborilgani aytilayotgan video tarqaldi. Videoda bokschining aynan nima sababdan tarkibdan chiqarilgani aytilmagan edi.

Nodirjon Mirzahmedov yaqin kunlargacha terma jamoa tarkibida jahon chempionati uchun tayyorgarlik olib borayotgan edi, u Kuba terma jamoasi bilan qo'shma mashg'ulotlarda ham ishtirok etgan edi. Olamsport.com'ga bergan intervyusida esa Mirzahmedov JCH tarkibidagi o'rni aniq bo'lganini istisno etmagan edi.


Tarkibdan "chopilganini" ochiq-oydin aytgan bokschimiz Olamsport.com'ga bergan qisqa interyuvsida bunga quyidagicha munosabat bildirdi:

"Yo'q, hech qanday sabab yo'q! Ko'rdingiz, O'zbekiston chempionatini ham yutdim bu yil, yana ishonishmadi va sparringlar qilishdi. Sparringlarda ham yutdim. O'zim ham tushunmay qoldim nega "chopishganini"... Lekin hamma sparring bosqichlaridan o'tgan edim. Ularning qarori esa shunaqa bo'ldi oxirida. Kattalarga yoqmabmiz, shekilli!".

Hozirda Nodirjonning o'rniga - 48 kg vazn toifasida kim ringga chiqishi malum emas, ammo katti ehtimol bilan endi bu vaznda SHodiyor Meliqo'ziev yurtimiz sharafini himoya qiladi.

Mirzahmedov o'tgan yili O'zbekiston chempionati finalida aynan Meliqo'zievni mag'lub etib, oltin medalni qo'lga kiritgan edi. Fevral oyida Bolgariyada bo'lib o'tgan "Stranja" musobaqasida esa Mirzahmedov chorak finalda mag'lub bo'lib, musobaqani tark etgan edi. Nodirjon bilan bir vaznda ishtirok etgan SHodiyor Meliqo'ziev esa Sofiya shahridagi turnirda oltin medalni qo'lga kiritgan edi.



Jahon chempionati uchun aynan qaysi jihat ustunlik qilgani qiziq: tajriba yoki yoshlarga imkoniyat berilishi

Meliqo'ziev ham o'z-o'zidan kelib qolmagani aniq bu yo'lgacha, uning "Stranja"dagi natijasi katta rol o'ynashi tabiiy. Ammo shu kungacha - 48 kg vaznda Nodirjon Mirzahmedov JCH uchun asosiy nomzod bo'lib kelayotgan edi. Uning musobaqaga bir hafta qolganida tarkibdan tushib qolgani, biroz kutilmagan qaror bo'lib qolmoqda.

Bundan avval O'zbekiston terma jamoasi tarkibida - 54 kg vaznda Miraziz Mirzaxalilov, - 80 kg vaznda jang qiluvchi Odijlon Aslonovlarning Toshkentdagi jahon chempionatida ringga chiqmasligi malum bo'lgan edi. Bunday kutilmagan qarorlarning hech biriga hozirgacha munosabat bildirilmadi.

Uzun-quloq gaplarga qaraganda, Miraziz Mirzaxalilov 2021 yilgi Jahon chempionatidan so'ng doping nazoratida bo'lmagan va shu sababli u bu safargi musobaqadan chiqarilgan. Ammo Odiljon Aslonov va mana endi Nodirjon Mirzahmedovning tarkibdan tushib qolishi — tushunarsiz.


Balki termada raqobatni oxirigacha ushlab turmoqchi bo'lishgandir (!), balki yoshlarga imkon berish birinchi vazifa sifatida olingandir. Ammo o'z yurtimizda o'tadigan ilk jahon chempionatida o'z vaznining "egalari" birin-ketin tarkibdan tushib qolayotgani shubxalarni ko'paytirsa ko'paytiryapti-ki, aslo kamaytirmayapti.


Bugun yoki ertaga terma jamoaning yakuniy tarkibi ham elon qilinsa kerak, shunda barcha savollarimizga javob olishimiz mumkin bo'ladi. Har qanday holatda ham muxlislik qilishda davom etamiz, shunchaki uni "so'ndirib" qo'yishmasa bo'lgani!

Diyorbek Mavlonov