"Ochiq eshiklar kuni" 600 nafardan ziyod yosh dzyudochilarni birlashtirdi FOTOREPORTAJ

Etiborlisi, "Ochiq eshiklar kuni" nomi ostida o'tkazilgan ushbu bellashuvlarda Surxondaryo, Buxoro, Samarqand, Jizzax, Farg'ona va Toshkent viloyatlari, Toshkent shahri, CHirchiq hamda poytaxtimizdagi olimpiya zaxiralari maktab internati jamoalarining yosh dzyudochilari tatamida o'z istedodlarini namoyish etishdi.

Xabaringiz bor, 2025 yil mamlakatimiz yoshlar o'rtasidagi Osiyo o'yinlariga mezbonlik qiladi. Bugungi tadbir uchun aynan bo'lajak qita o'yinlarida qatnashishi mumkin bo'lgan yosh toifasi ham tanlab olingan edi. Maqsad - shu kabi turnirlar, festivallar orqali yosh dzyudochilarni pishitib borish, katta musobaqalarga tayyorlash.

Maktab o'quvchilari o'rtasida o'tkazilgan musobaqa yoshlarda juda katta qiziqish uyg'otdi. Buni ishtirokchilarning soni hamda geografiyasi ham tasdiqlaydi. Bir vaqtning o'zida 600 nafardan ziyod yoshlar tatamida bellashishdi.

SHuningdek, bu kichik turnirni o'tkazishdan ko'zlangan maqsad - yoshlar o'rtasida dzyudoni ommalashtirish, sog'lom turmush tarzini sport orqali qaror toptirish, shu yo'nalishdagi Prezident farmonlarining ijrosini taminlashdan iborat. Toshkent shahrida test shaklida o'tkazilgan musobaqa endi viloyatlarda ham tashkil etiladi. 

Musobaqa so'nggida g'olib va sovrindorlarga tashkilotchilarning qimmatbaho sovg'alari topshirildi.