Olimpiada ishtirokchisi Komil To'xtaev qishki universiadada startga chiqdi

8 mart kuni tog' chang'ichilarimiz “Bobrovyy log” Fanparkida o'tkazilgan slalom-gigant bo'yicha bahslarda ishtirok etishdi, deb xabar qilmoqda Jismoniy tarbiya va sport vazirligi matbuot xizmati.  37 davlatdan 102 nafar sportchi qatnashgan bellashuvlar qizg'in bahslar boy bo'ldi. Keskin burilishlarga boy tepalikdan tezlik bilantushish sportchilarga oson bo'lmadi. Birinchi urinishdayoq xatoga yo'l qo'ygan va finish chizig'igacha etib kela olmagan 18 nafar sportchi bahslardan chetlashtirildi. Misol uchun keskin burilishda yo'l qo'ygan xatolari uchun supergigant bahslari g'olibi shveycariyalik Lukash Cippert bahslardan chetlatilgan bo'lsa, uning jamoadoshi superkombinaciya g'olibi Yannik SHablo 29-natijani qayd etdi. 

Pyongchangdagi qishki Olimpiya o'yinlarida bayroqdorimiz bo'lgan Komil To'xtaev birinchi chiqishda 59.48 natija qayd etdi. Ikkinchi chiqishda esa 1:03.43 daqiqada marraga etib bordi. Umumiy hisobda 2:02.91 natija ko'rsatgan Komil 102 nafar sportchi ichida 31-pog'onani qayd etdi. U peshqadam sportchidan 7.40 soniya kech finishga kirib keldi.

Yana bir sporchimiz Nizomiy nomidagi Toshkent davlat pedagogika universiteti talabasi Aldiyor Gaipov umumiy hisobda 2:20.90 natija bilan 51-o'rinni egallagan bo'lsa, ushbu muassasaning yana bir talabasi Damir Buxarbaev ikkinchi urinishda yo'l qo'yilgan xato sababli bahslardan chetlashtirildi.

Takidlash joiz, ushbu yo'nalishda oltin medalni mezbonlar vakili Ivan Kuznecov qo'lga kiritgan bo'lsa, kumush medal italiyalik Alberto Blendjiga va uchinchi o'rin shveycariyalik Livio Simonega nasib etdi.