Osiyo chempioni Ilyas Bekbulatovni tabriklaymiz!

Ilyas o'zi uchun terma jamoa libosidagi ilk katta musobaqa - shu yil Hindistonda o'tgan Osiyo chempionatida yurtimiz sharafini munosib himoya qilib, oltin medalni qo'lga kiritgandi. U hal qiluvchi final bellashuvida eronlik polvon Amirhusayn Ali Husaynidan ustun kelgan edi. Bekbulatov Osiyo chempionatida -70 kg vaznda gilamga chiqqan. Bu esa Olimpiada vazni hisoblanmaydi. Murabbiylarimiz -65 kg vazn toifasida aynan bugungi kun qahramonini ko'rishyapti va kurashchimizdan Olimpiya o'yinlarida ham umidlari katta.

"Ayni paytdagi vaznim 70 kg, lekin musobaqagacha ortiqcha 5 kilogrammdan xalos bo'lish men uchun qiyinchilik tug'dirmaydi. Nasib qilsa, -65 kg vazndagi Olimpiya o'yinlaridagi yoqimli ananani davom ettiraman. Buning uchun birinchi galda Olimpiada yo'llanmasini qo'lga kiritib olishim kerak. Bu vazifani uddalay olishimga ishonaman", - deydi Bekbulatov.

"SHogirdim Ilyasni bugungi tavallud kuni bilan chin yurakdan tabriklayman. U juda ham istedodli kurashchi. Hozirda karantin qoidalariga amal qilgan holda mashg'ulotlarni davom ettiryapmiz. O'ylaymanki, u Tokio Olimpiadasida O'zbekistonga oltin medalni taqdim etadi. Buning uchun esa avval olimpiya o'yinlariga yo'llanmani qo'lga kiritib olishimiz kerak", - deydi Ilyasning murabbiyi Ali Ahmedov. 

Fursatdan foydalanib, O'zbekiston sport kurashlari associaciyasi rahbariyati, murabbiylar shtabi hamda kurashchilar nomidan musobaqalarga Ali Ahmedov murabbiyligida tayyorgarlik ko'rayotgan Ilyas Bekbulatovni bugungi tavallud ayyomi bilan muborakbod etamiz.