O'zbek sporti afsonasi Oksana CHusovitina 43 yoshda!

1992 yilgi Olimpiya o'yinlari chempioni, 2008 yilgi Pekin Olimpiadasi vice-chempioni, uch karra karra jahon chempioni, Evropa chempionati va Osiyo o'yinlari g'olibi Oksana CHusovitina O'zbekistonning faxri hisoblanadi. U ettita yozgi Olimpiya o'yinlari ishtirokchisi (1992, 1996, 2000, 2004, 2008, 2012, 2016) hisoblanadi. Oksana ushbu ko'rsatkich orqali Ginnes rekordlari kitobiga hamda Xalqaro gimnastika shon-sharaf zaliga kiritilgan. Etiborlisi, CHusovitina professional faoliyatini yakunlamay turib shon-sharaf zaliga kirgan er yuzidagi yagona gimnastikachi hisoblanadi.

Oksana CHusovitinaning xizmatlari davlatimiz tomonidan munosib taqdirlangan. U O'zbekistonda xizmat ko'rsatgan sportchi faxriy unvoni egasi, shuningdek "Do'stlik", "Mehnat shuhrati" va "El-yurt hurmati" ordenlari bilan taqdirlangan.

U yana Olimpiya o'yinlarida ishtirok etmoqchimi?

"Nima uchun yo'q? Atrofdagilar meni aqldan ozganligimni muhokama qilishni to'xtatishdi. SHuncha yildan beri musobaqalarda ishtirok etib kelayapman, demak odamlar bunga o'rganishdi. Muammo nimada? Men musobaqalarga oxirgi o'rinni egallash uchun borayotganim yo'qku? Hattoki medallar qo'lga kiritayapman. Bu menga juda yoqyapti" - degandi Oksana o'z intervyularining birida.