O'zbek sportida tarixiy voqea! Jasurbek Rustamxonov AQSH xokkey klubi tomonidan draft qilindi!

Joriy mavsumda 18 yoshli Rustamxonov CHexiyaning "Karlovy" yoshlar jamoasida o'ynadi. U 30 ta o'yinda 23 ochko (13 ta gol va 10 ta assist) to'pladi.

AQSH yoshlar xokkey ligasida ishtirok etuvchi "Dubuque Fighting Saints" klubining bosh menejeri Trevor Edvards o'zbekistonlik hujumchini yuqori baholab, uni "juda dinamik va samarali gol urish qobiliyatiga ega o'yinchi" deb atadi. SHuningdek, Rustamxonovning xalqaro musobaqalarda O'zbekiston terma jamoasi safida ajoyib o'yin ko'rsatganini takidladi.

Malum qilinishicha, xokkeychi iyun oyida AQSHning Ayova shtati, Dubyuk shahriga sinov yig'ini uchun boradi. Klubning asosiy yig'ini 9–12 iyun kunlari bo'lib o'tadi. Ikki kunlik draft davomida jamoa jami 30 nafar o'yinchini tanlab olgan.

USHL — SHimoliy Amerikadagi eng kuchli yoshlar xokkey ligalaridan biri bo'lib, u orqali o'yinchilar keyinchalik NCAA va NHL kabi yuqori darajalarga chiqish imkoniga ega bo'lishadi.

Bu O'zbekiston xokkeyi tarixidagi ilk draft hisoblanadi. Malumot uchun, Draft qilindi degani — klub uni kelajakda jamoaga qo'shish uchun tanlab oldi deganidir. Bu hali rasmiy shartnoma emas, lekin katta imkoniyat. Jasurbek Rustamxonov avval sinov yig'inidan o'tishi kerak. Agar o'zini yaxshi ko'rsatsa, AQSHda o'ynashni boshlaydi.