O'zbekiston Antaliya "Katta Dubulg'a" turniridagi ishtirokini nechanchi o'rinda yakunladi?

Mukofot jamg'armasi 154 000 evroni tashkil etgan ushbu nufuzli musobaqada O'zbekiston terma jamoasining 19 nafar dzyudochisi ham medallar hamda Parij-2024 Olimpiadasi yo'lidagi qimmatli reyting ochkolari uchun bahs olib bordi. Ulardan birgina -73 kg vazndagi dzyudochimiz SHahram Ahadov terma jamoamizga yagona bo'lgan bronza medalini taqdim etdi. 

Bronza medali uchun kechgan bellashuvlarda mag'lubiyatga uchragan Sita Kadambaeva (-52 kg), Davlat Bobonov (-90 kg) va SHohruhxon Baxtiyorov (+100 kg) 5-o'rinni band etishdi. Dilshodbek Baratov (-60 kg) esa 7-o'rin bilan kifoyalandi. Qolgan dzyudchilarimiz chorak finalga etib kela olishmadi. 

Uch kunlik bahslari yakuniga ko'ra, O'zbekiston terma jamoasi 1 ta bronza medali bilan dunyoning 93 davlati orasida 18-o'rinni egalladi. Bittadan kumush va bronza medalini qo'lga kiritgan Tojikiston terma jamoasi qo'shimcha ko'rsatkichlarga ko'ra 13-pog'onadan joy oldi. 

Kutilganidek, Yaponiya terma jamoasi medallar jamg'arish bo'yicha katta ustunlik bilan peshqadamga aylandi. Dzyudo vatani vakillari 5 ta oltin, 1 ta kumush, 2 ta bronza medaliga egalik qilishdi. Afsonaviy Teddi Riner boshchiligidagi Franciya 3 ta oltin, 1 ta kumush, 2 ta bronza medalini qo'lga kiritdi. Rinerning o'zi ham chempionlik shohsupasiga ko'tarildi. Kuchli uchlikka 1 ta oltin va 2 ta bronza medali bilan Kanada terma jamoasi yakun yasab berdi.