O'zbekiston dzyudo federaciyasi qoshida Faxriylar kengashi tuzildi

Bu borada Vazirlar Mahkamasining 2019 yil 27 sentyabrdagi “Keksa avlod vakillarining jamiyatdagi o'rni va ijtimoiy faolligini yanada oshirish chora-tadbirlari to'g'risida”gi 816-son qaroriga asosan oktyabr oyining birinchi haftasi “Keksalar haftaligi” etib belgilangan edi.

SHundan kelib chiqib, O'zbekiston dzyudo federaciyasi tomonidan ham xayrli ishga qo'l urildi. Federaciya rahbariyati tomonidan berilgan taklifga ko'ra Faxriylar kengashi tuzildi. Bugun shu munosabat bilan federaciyada tadbir tashkil etildi va unga o'zbek dzyudosiga tamal toshini qo'ygan, bugungi yutuqlar poydevori asoschilari, dzyudo faxriylari taklif etildi. O'zbekiston faxriylar kengashi raisi Bahodir Mahsitov yig'ilishning kirish qismida faxriylarimizni Mustaqilligimizning 31 yilligi bilan qutlab, yangi tashkil etilgan Faxriylar kengashining ahamiyati va vazifalari haqida malumot berdi. 

SHundan so'ng tashkiliy masalaga o'tildi. Kelasi hafta o'zining qutlug' 72 yoshini qarshilaydigan tajribali murabbiy, pedagog, "Do'stlik" ordeni sohibi, uzoq yillar dzyudo rivojiga har tomonlama hissa qo'shib kelayotgan fan doktori, professor, dzyudo bo'yicha 7-DAN qorabelbog' sohibi Lev Yugay bir ovozdan O'zbekiston dzyudo federaciyasi qoshidagi Faxriylar kengashi raisi etib saylandi. Rafik Izmaylov rais o'rinbosari bo'ldi. Lev Pavlovich 1994-2005 yillar oralig'ida O'zbekiston dzyudo federaciyasi bosh kotibi, 2003-2011 yillarda esa Osiyo dzyudo ittifoqi Sport qo'mitasi azosi lavozimlarida faoliyat yuritgan. 

SHuningdek, 15 nafar faxriyimiz Kengash azoligiga saylanishdi. Ular orasida Aleksandr Istomin, Andrey SHturbabin, Rustam To'raev, Nag'manjon Mirzarahmonov, Ilhom Adizov, Server Muradasilov, Timur Muhammedxanov singari ustoz murabbiylar bor. 

Tadbir so'nggida O'zbekiston sport faxriylari kengashi raisi Bahodir Mahsitov, Sport yakkakurashlari bo'yicha Respublika oliy sport mahorati maktabi direktori Muzaffarxo'ja Rahmatxo'jaev,  O'zbekiston dzyudo federaciyasi bosh kotibi Ulug'bek Kabulov faxriylarimizga bayram munosabati bilan pul mukofoti topshirishdi. Faxriylarimizning dildan suhbati dasturxonga ko'chdi va bir piyola choy ustida davom etdi.