O'zbekiston Respublikasi Prezidentining yoshlarga bayram tabrigi

SHu munosabat bilan Prezident SHavkat Mirziyoev O'zbekiston yoshlariga bayram tabrigi yo'lladi.

Aziz o'g'il-qizlarim!

Barchangizni yurtimiz hayotidagi qutlug' bayram – Yoshlar kuni bilan samimiy tabriklab, o'zimning chuqur mehrim va ezgu tilaklarimni bildirishdan g'oyat mamnunman.

Bugungi kunda mamlakatimizda yangi O'zbekistonni barpo etishga qaratilgan ijtimoiy-siyosiy, iqtisodiy islohotlarni amalga oshirishda azmu shijoatli yoshlarimizning o'rni va tasiri tobora ortib borayotgani hammamizni quvontiradi. 

Hayotimizning barcha soha va tarmoqlarida, Vatan himoyasidek sharafli vazifani ado etishda millionlab yoshlarimiz sadoqat va fidoyilik bilan xizmat qilmoqda. Siyosiy saviyasi etuk, mustahkam fuqarolik poziciyasiga ega yuzlab yigit-qizlar parlamentimiz va xalq deputatlari mahalliy kengashlarining azosi sifatida davlat va xo'jalik boshqaruvi organlari hamda mahalliy hokimiyat idoralarida rahbarlik lavozimlarida faoliyat ko'rsatmoqda. 

Respublikamizda samarali ishlayotgan 227 mingga yaqin yosh tadbirkor va fermerlar, mohir hunarmandlar iqtisodiyotimiz taraqqiyotiga munosib hissa qo'shmoqda. Yurtimizda ularni har tomonlama qo'llab-quvvatlash uchun zarur sharoitlar yaratilmoqda.

Bu haqda gapirganda, birgina “Yoshlar – kelajagimiz” dasturi doirasida yosh avlod vakillarining 7 ming 775 ta biznes loyihasiga 1 trillion 635 milliard so'mdan ziyod imtiyozli kredit mablag'lari ajratilib, shu asosda 40 mingga yaqin yangi ish o'rni tashkil etilganini qayd etish lozim. 

Ana shunday etibor va g'amxo'rlik tufayli hududlarda 27 ta “Yosh tadbirkorlar” kovorking-markazlari hamda 157 ta “Yoshlar mehnat guzari” foydalanishga topshirildi. Ushbu majmualarda 2 ming 200 nafardan ortiq o'g'il-qizlarimiz o'z tadbirkorlik faoliyatini boshlagani etiborlidir. 

SHu bilan birga, “Har bir yoshga – bir gektar” loyihasi bo'yicha barcha hududlarimizda 65 mingga yaqin yosh dehqonlarga 54 ming 232 gektardan ziyod er ajratildi. 

Ana shunday muhim chora-tadbirlar tufayli so'nggi uch yilda  560 ming 200 nafarga yaqin yosh fuqaro ish bilan taminlandi.  

Bu yil koronavirus pandemiyasi hamda Buxoro va Sirdaryo viloyatlarida ro'y bergan ofatlar butun el-yurtimiz qatori yoshlarimiz irodasini ham sinovdan o'tkazdi. Ana shunday og'ir vaziyatlarda ming-minglab o'g'il-qizlarimiz chinakam mardlik va jasorat ko'rsatib, barcha tengdoshlariga o'rnak bo'ldilar.

Xususan, mamlakatimizda tashkil etilgan “Saxovat va ko'mak” umumxalq harakatining asosiy ishtirokchilari ham yoshlarimiz ekani, Harakat doirasida O'zbekiston yoshlar ittifoqining 4 ming 500 nafar azosi ko'ngilli sifatida faol ish olib borayotgani tahsinga loyiqdir.

Sardoba suv omboridagi toshqindan talofat ko'rganlarga yordam va ko'mak ko'rsatish maqsadida Yoshlar ittifoqining xayriya karvoni tashkil etilib, aholiga kiyim-kechak, sanitariya vositalari, oziq-ovqat mahsulotlari, shuningdek, katta miqdordagi o'quv qurollari va sport anjomlari, badiiy adabiyotlar etkazib berildi. 

O'z navbatida, bunday ezgu ishlar Buxoro viloyatining kuchli dovuldan zarar ko'rgan Olot va Qorako'l tumanlarida ham amalga oshirilgani sizlarning vatanparvarlik va olijanoblik fazilatlaringizdan dalolat beradi.

Fursatdan foydalanib, og'ir sinov kunlarida xalqimizga haqiqiy tayanch va suyanch bo'lib maydonga chiqqan Qurolli Kuchlarimizning mard va matonatli harbiy xizmatchilariga, jonkuyar shifokorlar, bunyodkor quruvchilar, saxovatli tadbirkorlarimizga, ilm-fan, madaniyat va sport sohasi vakillariga, Yoshlar ittifoqining faol azolariga – barcha O'zbekiston yoshlariga chin qalbimdan minnatdorchilik bildiraman. 

Vatanimiz, el-yurtimiz sizlar kabi fidoyi va jasur farzandlari bilan hamisha faxrlanadi!

Muhtaram yosh do'stlarim!

Bugungi kunda zamonaviy ilm-fan va yuqori texnologiyalarni mukammal egallash har qanday davlat va jamiyat taraqqiyotining hal qiluvchi shartiga aylanib borayotgani hech kimga sir emas. Ana shu haqiqatni chuqur anglagan holda, biz navqiron avlodimizning ham jismoniy, ham manaviy jihatdan barkamol bo'lib voyaga etishi uchun bor kuch va imkoniyatlarni safarbar etmoqdamiz. 

SHu maqsadda ulug' allomalarimiz nomidagi ixtisoslashtirilgan maktablar, Innovacion rivojlanish vazirligi qoshida Yoshlar akademiyasi, Farg'ona shahrida “Loyihalar fabrikasi” faoliyati yo'lga qo'yilgani, Prezident va ijod maktablari bo'yicha dasturlarimiz izchil davom ettirilayotgani sizlarga yaxshi malum.

Iqtidorli yoshlarni yanada qo'llab-quvvatlash uchun har bir hududda Yoshlar texnoparklarini barpo etishni boshladik. Umumiy qiymati 30 milliard so'mdan ortiq bo'lgan “Yosh olimlar” amaliy va innovacion loyihalar tanlovi elon qilindi.

Karantin sharoitiga qaramasdan, 6 milliondan ortiq maktab o'quvchilari, 468 ming talaba o'quv dasturlarida belgilangan darslarni o'z vaqtida va sifatli o'zlashtirdi. “Online-maktab” loyihasi doirasida 17 ta fan bo'yicha 4 mingdan ortiq telemashg'ulotlar o'tkazildi.

Bu jarayonga eng malakali pedagoglar jalb etildi, jumladan, Toshkentdagi Prezident maktabining xorijlik mutaxassislari tomonidan ham mahorat darslari olib borildi. Imkoniyati cheklangan bolalarni o'qitishga alohida etibor qaratilib, barcha darslar surdopedagog va surdotarjimonlar tomonidan tushuntirib borildi. 

O'zbekistonning bu tajribasi YUNESKO, YUNISEF, Jahon banki kabi xalqaro tashkilotlar tomonidan etirof etilmoqda. 

Bugungi shiddatli zamonda, global miqyosda raqobat kuchayib borayotgan murakkab vaziyatda yuksak intellektual salohiyatga ega kadrlarga ehtiyoj har qachongidan ham ortib bormoqda. SHu bois biz o'z oldimizga qo'ygan ulkan va masuliyatli vazifalardan kelib chiqib, mamlakatimiz oliy talim tizimida tub o'zgarishlarni amalga oshirmoqdamiz. 

Jumladan, keyingi uch yilda respublikamizdagi oliy o'quv yurtlari soni 60 foizga oshib, 116 taga etdi. Ular orasida nufuzli xorijiy universitetlarning filiallari borligi alohida etiborga loyiq. Mamlakatimizda oliy talim muassasalariga qabul kvotalari soni izchil oshirib borilmoqda. Agar 2016-2017 o'quv yilida bu raqam 58 mingtani tashkil etgan bo'lsa, joriy yilda 150 mingtaga etadi. Yani, bu yil maktab bitiruvchilarining 25 foizi oliy o'quv yurtlarida o'qish imkoniga ega bo'ladi. Holbuki, 2017 yilda bu raqam 9 foizga teng edi.

Millat genofondini saqlash va davom ettirishning muhim omili bo'lgan yosh oilalarni qo'llab-quvvatlash masalasi doimo etiborimiz markazida bo'lib kelmoqda. So'nggi uch yilda 2 ming 668 ta yosh oilaga uy-joy uchun 121 milliard 244 million so'm boshlang'ich to'lov mablag'lari 20 yil davomida foizsiz qaytarish sharti bilan to'lab berildi.

Barchamiz guvohmiz – bugun dunyo misli ko'rilmagan suratlar bilan keskin o'zgarib bormoqda. Ijtimoiy hayotimizda ko'plab ijobiy jarayonlar bilan birga, yosh avlodning qalbi va ongini egallashga qaratilgan manaviy tahdidlar ham tobora xavfli tus olmoqda. 

Bunday murakkab vaziyatda farzandlarimizni zararli tasirlardan asrash, doimo hushyor va ogoh bo'lib yashash eng dolzarb vazifamiz bo'lib qolmoqda. 

Yoshlarimizni ona Vatanimizga, mustaqillik g'oyalariga muhabbat va sadoqat ruhida tarbiyalash, ularning istedod va qobiliyatini, ezgu intilishlarini ro'yobga chiqarish yo'lida boshlagan katta ishlarimizni bundan buyon ham qatiyat bilan  davom ettiramiz. 

Ayni shu maqsadda yurtimizning barcha viloyat va tumanlarida, shahar va qishloqlarimizda yangi-yangi talim dargohlari, madaniyat va sanat maskanlari, sport inshootlari barpo etilib, yoshlar ixtiyoriga berilmoqda. 

SHular qatorida poytaxtimizda bunyod etilgan muhtasham “G'alaba bog'i”, “SHon-sharaf” muzeyi, Toshkent shahrining tarix muzeyi, betakror Adiblar xiyoboni farzandlarimizni milliy va umuminsoniy qadriyatlar ruhida kamol toptirishga xizmat qilishi shubhasiz. 

Yoshlarimizni jismoniy sog'lom, manaviy etuk insonlar etib tarbiyalash uchun besh ijobiy tashabbus doirasida ko'plab stadionlar, suv havzalari, sport majmualari va saroylari barpo etilmoqda.

Eng muhimi, farzandlarimiz o'rtasida sport bilan muntazam shug'ullanadigan, sog'lom turmush tarzini o'z hayotiy maqsadiga aylantirgan yigit-qizlar safi kengayib bormoqda. 

Qadrli vatandoshlar!

Bugun jonajon O'zbekistonimizda erkin va obod, farovon hayot qurish yo'lida biz boshlagan ulkan ishlarni davom ettirishga qodir bo'lgan yangi avlod shakllanmoqda. 

Aziz o'g'il-qizlarim, hech qachon unutmang, xalqimiz, Vatanimiz sizlardan buyuk ishlarni kutmoqda. 

SHu muqaddas ishonch va masuliyatni har tomonlama oqlash, unga munosib bo'lish – dunyodagi eng ulug' baxtdir. SHunday baxt, shunday sharaf barchangizga nasib etsin!

Sizlarni sevimli bayramingiz, azmu shijoat, go'zallik va kamolot ayyomi – Yoshlar kuni bilan yana bir bor samimiy tabriklab, barchangizga sihat-salomatlik, baxt va omad tilayman.

SHavkat Mirziyoev,

O'zbekiston Respublikasi Prezidenti