O'zbekiston stol tennisi federaciyasi vakillari ishtirokida seminar tashkil qilindi

O'zbekiston Respublikasi Prezidentining 2017 yil 3 iyundagi “O'zbekiston Respublikasida jismoniy tarbiya va ommaviy sportni yanada rivojlantirish chora-tadbirlari to'g'risida”gi PQ-3031-son qarori bilan tasdiqlangan “O'zbekiston Respublikasida jismoniy tarbiya va ommaviy sportni yanada rivojlantirish Dasturi”da belgilangan vazifalarning ijrosini taminlash maqsadida bugun, 22 fevral kuni O'zbekiston davlat jismoniy tarbiya instituti huzuridagi Jismoniy tarbiya va sport bo'yicha mutaxassislarni ilmiy-metodik taminlash, qayta tayyorlash va ularning malakasini oshirish markazida O'zbekiston stol tennisi federaciyasi ijrochi direktori Odina Burxonxo'jaeva, O'zbekiston terma jamoasi bosh murabbiyi Saida Mahmudova, terma jamoa azolari Zohid Kenjaev, Rimma Gufranova, Rozalina Xojieva va Olga Kim, shuningdek Markaz direktori Ilhomjon Tursunaliev, kafedra mudirlari, professor-o'qituvchilar va tinglovchilar o'rtasida uchrashuv tashkil etildi.

Mazkur uchrashuvda Odina Burxonxo'jaeva O'zbekiston Respublikasi Prezidentining 2017 yil 9 martdagi “O'zbekiston sportchilarini 2020 yilda Tokio shahrida (Yaponiya) bo'lib o'tadigan XXXII yozgi Olimpiya va XVI Paralimpiya o'yinlariga tayyorlash to'g'risida”gi PQ-2821-son qarori ijrosi yuzasidan federaciyada amalga oshirilayotgan ishlar haqida hisobot berib o'tdi.

Saida Mahmudova ixtisoslashtirilgan bolalar-o'smirlar sport maktablari va bolalar-o'smirlar sport maktablaridan milliy terma jamoa uchun sportchilarni saralab olish va ularning xalqaro musobaqalarda erishayotgan natijalari tahlili yuzasidan qatnashchilarga malumot berdi.

Uchrashuv ishtirokchilari O'zbekiston stol tennisi federaciyasi vakillari va milliy terma jamoa azolaridan o'zlarini qiziqtirgan savollarga javob oldilar.

Undan tashqari, Saida Mahmudova, Rimma Gufranova, Rozalina Xojievalar ishtirokida Markazning stol tennisi guruhi uchun mahorat darsi tashkil etildi. Unda sportchilar uchun kerakli maslahatlar berildi. Texnik-taktik o'yinlar, to'p uzatishlar va o'yin davomida bo'ladigan texnik harakatlar namoyish etib berildi.