O'zbekistonda stol tennisi bo'yicha xalqaro yig'in o'tkazilmoqda

Bu haqida O'zbekiston stol tennisi federaciyasi mutasaddilari saytimizga malumot berishdi. 

O'zbekiston stol tennisi federaciyasi, Jismoniy tarbiya va sport vazirligi, Milliy olimpiya qo'mitasi bilan hamkorlikda, Osiyo stol tennisi federaciyasining 2019 yildagi "ITTF ASIA DEVELOPMENT PROGRAM" dasturi asosida tashkil etilayotgan haftalikda 10 yoshdan katta bo'lgan sportchilar xalqaro o'quv-mashg'ulot yig'inida qatnashishmoqda.

Yoshlarni xalqaro musobaqalarga tayyorlash, istedodlarini yanada yuksaltirish va boy tajribaga ega bo'lish maqsadida o'tkazilayotgan "Markaziy Osiyo Olimpiya umidlari" haftaligida stol tennischilarimizdan tashqari, Markaziy Osiyo va Eron davlatlarining terma jamoalari ishtirok etadi.

Haftalik davomida terma jamoa azolari taktik-texnik, jismoniy holat bo'yicha nazariy hamda amaliy mashg'ulotlar o'tkazadi. Eslatib o'tamiz, mazkur o'quv mashg'ulot yig'ini mamlakatimiz va Markaziy Osiyo davlatlari tarixida ilk marotaba o'tkazilmoqda.

Yig'in 27 dekabrgacha davom etadi.