Ozodbek - Jahon chempionatining kumush medali sovrindori!

Musobaqaning so'nggi kuni yunon-rum kurashi bo'yicha beshta vaznda g'olib va sovrindorlar nomi malum bo'ldi. Olimjon Qurbonov va Baxtiyor Sayfiev murabbiyligidagi 3 nafar klassigimiz kechagi bahslarda jahon chempionati medallari uchun gilamga chiqishdi.

Quvonarlisi, saralash bellashuvlarida muvaffaqiyatli ishtirok etgan Ozodbek Xalimboev finalga qadar etib keldi. 45 kg vazn toifasidagi kurashchimiz 1/8 finalda isroillik Amare Feteneni 7-0, 1/4 finalda armanistonlik Levon Martirosyanni 6-0, 1/2 finalda esa gruziyalik Anri Xozrevanidzeni 11-0 hisobida dog'da qoldirdi. Jahon chempionatining oltin medali uchun kechgan bellashuvda esa ukrainalik Nikita Dementevga kichik hisobda yutqazib, kumush medalga sazovor bo'ldi. 

60 kg vazndagi kurashchimiz Azizbek Yo'ldoshev bronza medali yo'lidagi o'tish bellashuvida rossiyalik Abdulla Salimovga 0-7 hisobida yutqaza turib, yakunda "tushe" bahosi bilan sof g'alabaga erishdi. Ammo, bronza medali uchun bahsda yutqazib qo'ydi. 92 kg vazn toifasidagi Javlon Tirkashev esa bronza medali uchun kechgan bellashuvda rossiyalik Timur CHernishevga imkoniyatni boy berdi.