Pavel Xan: “Bokuda eng kamida Meksikadagi natijani qaytaramiz”

Mazkur yig'in 29 may – 6 iyun kunlari Ozarbayjonda o'tadigan jahon chempionatiga tayyorgarlikning asosiy bosqichi hisoblanadi. Etiboringizga terma jamoa bosh murabbiyi Pavel Xan bilan yakuniga etib borayotgan mashg'ulotlar, dunyo birinchiligidan kutilayotgan natijalar haqidagi qisqa suhbatni havola qilamiz:

– Jahon chempionatiga tayyorgarlikda nega aynan Turkiya yig'ini tanlandi?
– Biz bu joyga yil avvalida ham kelgan edik. Dunyo birinchiligiga tayyorgarlikda yana bu bazani tanlashimizga uning qulay nuqtada joylashgani sabab bo'ldi. Sport zali Antalyaning tog'li hududlarida, shahardan uzoqroq maskanda bo'lib, barcha kerakli sharoitlarga ega. SHu bois, sportchilar bo'sh vaqtlarida uzoqqa ketib qola olmaydi, ortiqcha narsaga chalg'ishmaydi. Qolaversa, tabiati va havosi yoqimli. Uning dengiz sathidan balandligi ham biz uchun juda qulay.

– Yig'in reja asosida ketmoqdami? Hozir nimalarga ahamiyat berilyapti?
– Yig'in avvalida umumiy-jismoniy tayyorgarlikka, atletlarning ko'proq kuch yig'ib olishiga etibor qaratgan edik. Hozirgi bosqichda texnik va taktik harakatlar ustida ishlayapmiz. Har bir sportchi bilan alohida tartibda kamchiliklari bo'yicha shug'ullanyapmiz. Termadagi boshqa murabbiylar bilan bo'lajak musobaqalarda duch kelishi mumkin bo'lgan raqiblarini ham o'rganyapmiz.

– Bu yilgi jahon chempionatida Meksikadagi natijani takrorlay olamizmi?
– Meksikadagi dunyo birinchiligi biz uchun tarixda qoldi. Bu yil undagi ko'rsatkichlarni qaytarish oldimizdagi eng minimal vazifa. Lekin uni yanada yaxshilash uchun, ko'proq oltin medallarga ega chiqish uchun jamoamiz bilan bor kuchimizni ishga solamiz. Buning uchun bizga davlatimiz tomonidan barcha sharoitlar yaratilmoqda. Kerakli o'quv-mashg'ulot yig'inlari tashkil etilyapti.

– Jahon chempionati uchun terma jamoa tarkibi aniqmi?
– Ha, aniq. Faqat uni muxlislar va OAV uchun yana bir necha kun ichida elon qilamiz. Undan hozirgi kunda o'z vazn toifalarida birinchi raqamli bo'lib turgan sportchilar joy olgan.