Premier League. Saymatov 7 oy kutilgan medalni taqdim etdi

Afrika qitasidagi musobaqada O'zbekiston terma jamoasining 6 nafar azosi ham ishtirok etdi. Sayyoramizning 78 davlatidan 700 nafarga yaqin karate ustalari qatnashgan musobaqa Tokio Olimpiadasiga muhim reyting ochkolari taqdim etishi bilan ham ahamiyatli edi. 

-60 kg vazn toifasida yurtimiz sharafini himoya qilgan eng ishongan sportchimiz Sadriddin Saymatov bronza medalini qo'lga kiritdi. Bu medalni terma jamoamiz 7 oy kutishiga to'g'ri keldi. So'nggi bor bu kabi nufuzli turnirda 2018 yilning oktyabrida medalga ega bo'lgan ekanmiz. 

Aniqrog'i, Yaponiyaning Tokio shahrida o'tgan Premier League seriyasiga kiruvchi nufuzli musobaqada -67 kg vazn toifasida yurtimiz sharafini himoya qilgan Iqboljon Uzoqov bronza medalini qo'lga kiritgan ekan. Iqboljon Franciya, Avstriya, Qozog'iston vakillarini mag'lub etib, yarim finalda turkiyalik raqibiga imkoniyatni boy berib qo'ygandi. Bronza medali uchun bahslarda esa Ukraina va Franciya karatechilaridan ustun kelib, bronza medali egasiga aylangan edi. 

Rabatdagi Premer liga musobaqasida qatnashgan qolgan karatechilarimiz Sanjar Abdukarimov, Iqboljon Uzoqov (-67 kg), Dostonbek Otabolaev (-75 kg), Bahriniso Boboeva (-50 kg) va Barno Mirzaeva (-61kg) yana quruq qo'l bilan Vatanga qaytishdi. Undan avvalgi SHanxay, Parij, Dubay, Zalcburgdagi musobaqalarda bitta ham medal qo'lga kiritilmadi. Bu ketishda Tokio Olimpiadasi o'zbekistonlik karatechilarsiz o'tadigan ko'rinadi.    

Eng ishongan karatechimiz Sadriddin Saymatov reytingda ancha quyiga sho'ng'ib ketgan. Uning vaznida qozog'istonlik Assadilov barchani xayratlantirishda davom etmoqda. U o'tgan yili jahon chempionatida bronza medalini qo'lga kiritganidan keyin ketma-ket o'zi qatnashgan barcha musobaqalardan medal bilan qaytmoqda va ayni paytda reytingning 4-pog'onasiga ko'tarilib olgan.